أخبار محكمة الأسرة اليوم
سميرة لـ محكمة الأسرة: زقني من على السلم عشان المخدرات
قصدت سميرة محكمة الأسرة حتى ترفع دعوى خلع ونفقة على زوجها مدمن المخدرات الذي سيطر الإدمان على حياته وعقله، حتى كان يتعاطى المخدرات أمام أبنائه وعندما اعترضت الزوجة على الوضع الذي كانت تعيش فيه مع زوجها ، ما تلقته منه هو الضرب والإهانة وكانت ستخسر حياتها مما جعلها تتوجه لمحكمة الأسرة.
قصص محكمة الأسرة..اتجوزنا بسرعة بسبب الأهالي
قالت «سميرة» في بداية حديثها :«أنا اتجوزت من 4 سنين خلفت من جوزي ولدين، بقالي سنة سايباه، أنا وهو كان جوازنا تقليدي اتقدملي وكان كويس في الخطوبة وفي أول الجواز، بس احنا اتجوزنا بسرعة ومكناش نعرف بعض كويس أهلي هما السبب مكنوش بيخلوني اشوفه عشان اعرفه كويس قبل الجواز».
دعاوي محكمة الأسرة.. جوزي بيشرب مخدرات من زمان
أكملت «سميرة» حديثها وقالت: «بعد الجواز والخلفة بان عليه التغير وحقيقته بانت كان صعب جدا التعامل معاه وطريقته وحشة معايا بيشتم وبيغلط فيا وعصبي جدا، في الأول مكنتش أعرف ليه بس بعد كدة عرفت إنه بيشرب مخدرات، عرفت لأنه كان بيشرب المخدرات قدامي أنا والعيال».
حكايات محكمة الأسرة.. مضيع فلوسه على المخدرات
تابعت «سميرة» حديثها قائلة: «مرضيتش اسيبه لما عرفت انه بيشرب قلت يمكن يبطل ويتعدل وعشان مخربش بيتي وابهدل ولادي، بس الحياة معاه كانت صعبة وكلها مشاكل، اتبهدلت معاه كتير من ساعة ما اتجوزنا، خناقتنا كانت كتير كنا بنتخانق عشان بيصرف على المخدرات ومش مكفي مصاريف البيت ولا بيصرف على الولاد».
قضايا محكمة الأسرة.. زقني من على السلم عشان عايزة حقي
أنهت «سميرة» حديثها قائلة: «لحد ما زهقت منه ومن عمايله واتخانقت معاه لأنه بيشرب مخدرات قدام العيال ، طلبت منه يبطل لأن مينفعش الوضع اللي كنا عايشين فيه ده رفض انه يبطل ، هددته إني اخد العيال وهسيبه ، قالي مش هتاخدي حاجة من حقك ولا العيال، كنا بنتخانق على السلم و ضربني وزقني من سلم الدور التاني عشان كان عايز يطردني ويمشيني وميدنيش العيال، من ساعتها مرجعتلوش تاني لأني خفت منه خلاص ومش عايزاه ولا أقدر أكمل معاه، وجيت أرفع قضية خلع ونفقة لانه مبيسالش بقاله سنة من ساعة ما سيبته».
تابع أحدث الأخبار عبر
