أخبار محكمة الأسرة
دعاء لـ محكمة الأسرة : رامينا بقاله سنة من غير سؤال عشان المخدرات
كانت المخدرات سبب تواجد دعاء في محكمة الأسرة مثل العديد من السيدات غيرها تدمرت حياتهم بسبب سم المخدرات، وبالنسبة لقصة دعاء مشاكلها مع زوجها كانت عديدة فلم يصرف زوجها عليها ما تحتاجه هي أو أولادها ولم يكن سند لها او رجل متحمل مسؤولية اسرته وكان كل اهتمامه للمخدرات ومزاجه فقط حتى اضطر الزوجة أن تصل لمحكمة الأسرة حتى تحصل على حقوقها وحريتها بعد تركه لها وأبنائه لسنه كاملة دون سؤال.
قصص محكمة الأسرة.. أتجوزت في شقة ابويا
قالت «دعاء» في بداية حديثها: «أنا متجوزة من 6 سنين، معايا من جوزي ولد عنده سنتين وبنت خمس سنين، أنا وجوزي منفصلين بقالنا سنة، مكناش قرايب كان جواز صالونات لما اتقدملي مكنش معاه يجيب شقة ابويا ساعده واداله شقة وضبها واتجوزنا فيها والدنيا كانت كويسة وماشية والمشاكل بينا كانت العادية».
دعاوي محكمة الأسرة..طلع بيشرب مخدرات
أكملت «دعاء» حديثها وقالت: «كان فيه مشاكل كتير معاه بس اللي خلاني اسيبه انه بيشرب مخدرات من زمان ومكنتش اعرف في الأول بدأت اشك لما بقى بيسهر كتير برة البيت وحاله متغير وعلى طول مش في وعيه، لحد ما صاحب المكان اللي هو شغال فيه طرده عشان بيشرب اتاكدت ساعتها، لما واجهته انكر وقال مبيشربش مرضيتش اكمل معاه أول لما عرفت وطلبت الطلاق».
حكايات محكمة الأسرة..بيضربني عشان أمه
تابعت «دعاء» حديثها قائلة: «مزعلتش اننا سيبنا بعض لأنه مبيصرفش من زمان وأنا اللي كنت بشتغل واصرف على البيت والولاد وابويا كان بيساعدنا في المصاريف ، وهو مكبر دماغه وعرفت بعد كدة انه بيصرف على المخدرات بس، وفوق كل ده كان بيضربني في كل مشكلة بتحصل بسبب أمه واتحملت كل ده عشان ولادي».
قضايا محكمة الأسرة.. مبيسألش في ولاده بقاله سنة
أنهت «دعاء» حديثها قائلة: «لما طلبت الطلاق قالي مش هيطلق، وراح عند والدته ومن ساعتها مبيبعتش مصاريف ولا بيسأل على الولاد حاول يرجعني وقال هيبطل المخدرات لكن مبطلش، اضطربت ارفع خلع عشان هو رافض يطلق، ورفعت نفقة عشان بقاله سنة مبيدفعش جنيه حتى لولاده».
تابع أحدث الأخبار عبر
