أخبار محكمة الأسرة
«بضرب لو طلبت حقوقي».. نادية لـ محكمة الأسرة: كسرلي عضمي عشان رفضت أخرج من البيت
سنين من القسوة كان حلها أن تتوجه الزوجة لمحكمة الأسرة، منذ زواج «نادية» التي اكتشفت أن الضرب والإهانة هي لغة زوجها في التعامل، وتحملت الزوجة أن تهان إذا طلبت أبسط حقوقها أو حتى بدون مبرر، وتحملت الزوجة هذا العذاب من اجل أبنائها ومن اجل الا تخرب بيتها ولكن عندما ادركت انها اذا اكملت الحياة مع زوجها سوف تخسر حياتها توجهت لمحكمة الأسرة حتى ترفع دعوى طلاق للضرر.
قصص محكمة الأسرة..الناس قالوا عليه محترم
قالت «نادية» في بداية حديثها :«انا متجوزة من 15 سنة وخلفت من جوزي ولد وبنت، أنا وهو مكناش نعرف بعض قبل الجواز والخطوبة لنت قصيرة ملحقتش اعرفه كويس، بس لما أهلي سالوا عليه الناس قالوا إنه كويس وأهله كويسين ومحترمين وأنا وافقت عليه وتجوزته لما صدقت كلام الناس إنه كويس».
دعاوي محكمة الأسرة.. بضرب لو طلبت حقوقي
أكملت «نادية» حديثها وقالت: « بعد الجواز كل الحقيقة بانت، الحياة معاه كان كلها إهانة بسبب ومن غير سبب، لو طلبت أروح عند أهلي اتضرب طلبت اروح في حته اتضرب طلبت حاجة ليا اول للعيال اتضرب، كان مبيصرفش علينا غير قليل ومقدرش اتكلم استحملته كتير لكن مفيش فايدة معاه الضرب عنده اسهل حاجة».
حكايات محكمة الأسرة..الأول كان بيعتذر دلوقتي لا
تابعت «نادية» حديثها قائلة: «بيضربني من زمان وعلى طول، كان بيرجع ويقولي معلش ومش هعمل كدة تاني بس ده كان في الاول بس بعد كدة مبقاش حتى يعتذر، اتحملت كتير مفيش حد يستحمل اللي اتعمل معايا والبهدلة اللي عيشت فيها دي بس صبرت عشان خاطر ولادي وبيتي ميتخربش».
قضايا محكمة الأسرة.. كسرلي دراعي عشان مسيبش البيت الفجر
أنهت «نادية» حديثها قائلة: «لحد آخر مرة عمل معايا مشكل من غير سبب زي العادي وكان مصمم يطردني من البيت واحنا في الفجر ولما رفضت اخرج ضربني وكسرلي دراعي وكان هيموتني في ايده وعملت فيه محضر ورفعت بيه قضية طلاق للضرر ورحت عند أهلي ومقدرتش ارجعله تاني لأن العيشة معاه بقت مستحيلة وولادي معايا ومبيسألش فيهم كأنه ملوش عيال».
تابع أحدث الأخبار عبر
