أخبار محكمة الأسرة
محكمة الأسرة ومآسيها.. وفاء : اعتبرتهم ولادي ولما كبروا رموني في الشارع
تواجدت «وفاء» في محكمة الأسرة وهي في شن كبير، فلم تتوقع ژبدا أن تصل لهذه النهاية ولكن سبب وصولها لأعتاب محكمة الأسرة هو الغدر الذي شهدته من أقرب الناس إليها، من قدمت لهم يد العون ووجدت منهم القسوة عليها ونكران الجميل، فما قصتها؟
قصص محكمة الأسرة.. أنا اللي جهزت بيتي
قالت «وفاء» في بداية حديثها: «أنا عندي 58 سنة اتجوزت من 22 سنة جواز صالونات، لما اتجوزت جوزي كان عنده ولدين صغيرين وامهم ماتت، وافقت اتجوزه واعتبرتهم ولادي ولما اتجوزنا أنا اللي جهزت البيت جوزي جابلي اوضة نوم بس لأن هو ده اللي كان يقدر عليه».
دعاوي محكمة الأسرة.. استحملت جوزي عشان العيال
أكملت «وفاء» حديثها وقالت: «كنت بحبهم وربتهم وكبرتهم ومخلفتش واعتربت ان هما ولادي ونصيبي، واستحملت عشانهم جوزي كان على طول مش معاه فلوس وبيصرف قليل جدا عليا وعليهم، بس كنت صابرة عليه عشان خاطرهم وكنت بتصرف وبستلف واعمل جمعيات و بقول ملهمش غيري وايتام، عملتهم وكبرتهم وجوزت الكبير والصغير دلوقتي في الجامعة».
حكايات محكمة الأسرة.. ولاد جوزي رموني في الشارع
تابعت «وفاء» حديثها قائلة: «لحد ما جوزي تعب من فترة ومات من قريب وقتها كنت حزينة عليه، وقبل الاربعين حتى بتاعه الولد الكبير طردني من البيت اللي كنا عايشين فيه، رموني في الشارع وخدوا كل حاجتي وبالرغم من كدة رفضت أرفع عليهم قضايا بالعفش اللي اخدوه مع انه بتاعي وانا اللي جايباه وابوهم مكنش جايب حاجة».
قضايا محكمة الأسرة.. بيقولوا عليا مش امهم
أنهت «وفاء» حديثها عن تواجدها في محكمة الأسرة قائلة: «حاولت معاهم كتير اني ارجع البيت او حتى اخد حاجتي لان مليش مكان اروحه ومش بشتغل، لكن مفيش فايدة معاهم بيقولوا انتي مش امنا وملكيش حق ومش هنديكي حاجة، نسيو كل تعبي وشقايا عليهم، وجيت المحكمة عشان أرفع قضية إعلام وراثة عليهم بعد ما كلوا حقي وسابوني من غير اي حاجة ومش بيسالوا فيا حتى، مع اني كنت رافضة ارفع عليهم قضايا لكن هما مسابوليش حل تاني».
تابع أحدث الأخبار عبر
