أخبار محكمة الأسرة اليوم
عامر لقاضي الأسرة: سابت البيت وخدت حاجتها ورفعت قضية طلاق للضرر
لم يمر وقت طويل على زواجها، وبدأت تدب بينهما المشاكل، التي زادت بعد تدخل الأهل والأقارب، الذين حولوا حياتهم إلى جحيم، وصل إلى طلبها الطلاق، ليقف «عامر» أمام قاضي الأسرة ليحكي قصته بعدما رفعت الزوجة قضية طلاق للضرر.
قصص محكمة الأسرة..جواز تقليدي زي أيس اتنين
قال «عامر» في بداية حديثه: «أنا كنت متجوز بقالي 5 سنين ومنفصل أنا ومراتي بقالنا 6 شهور، أنا وهي مكناش نعرف بعض قبل الجواز، كان جواز تقليدي جدا زي أي اتنين عاديين، عرفتها عن طريق ناس قالوا عليها أنها كويسة سمعت كلامهم واتقدمتلها كانت مناسبة ومفيش مشاكل».
حكايات محكمة الأسرة..بترمي ودنها للناس
تابع «عامر» حديثه قائلا: «في أول الجواز الدنيا كانت كويسة ومفيش مشاكل خلفت منها ولد واحد، ولما كان حتى بيحصل بينا أي مشكلة كانت بتبقى صغيرة وأنا بحتوي الموقف، المشاكل مكترتش غير لما أهلها بدأوا يتدخلوا بينا وهي بقت تسمع كلام ورأي الناس وترمي ودانها ليهم».
دعاوي محكمة الأسرة..استغلت عدم وجودي في البيت وخدت منه حجات
أضاف الزوج لكلامه: «المشاكل بينا فضلت مكملة لحد في مرة حصل مشكلة غضبت وسابت البيت وخدت الولد معاها وقتها حاولت ارجعها لكن هي رفضت وسيبتها براحتها هي مطلبتش الطلاق وأنا كنت ببعتلها مصاريفها هي والولد عشان متبقاش محتاجة حاجة، بعد ما سابت البيت بفترة استغلت غيابي ورجعت وخدت حجات من البيت كتيرة من دهب وفلوس وحجات في العفش وقالت إن ده حقها».
قضايا محكمة الأسرة..رفعت عليا قضايا عشان اتجوزت
أنهى «عامر» حديثه قائلا: «حاولت معاها كذا مرة أنها ترجع ورفضت، ومن قريب اتجوزت واحدة قريبتي أول ما عرفت عملت مشاكل كتيرة جدا ورفعت عليا قضية نفقة مع إني بصرف عليها هي والولد عادي، وبعد كام شهر رفعت عليا قضية طلاق للضرر عشان اتجوزت واحدة تانية مع إني اتجوزت بعدما سابتني، وجيت المحكمة عشان أعرف مصير قضية الطلاق إيه أنا مش عايز أطلقها عشان ابني ميتبهدلش».
تابع أحدث الأخبار عبر
