أخبار محكمة الأسرة اليوم
نسمة لـ محكمة الأسرة : سرقني وطفش بعد ما بعت كل دهبي عشانه
تواجدت نسمة في محكمة الأسرة بسبب زوجها الذي سرقها ولم يقدر مساعدتها له أو وقوفها بجانبه طوال هذه السنين، كانت نسمة مثل أي زوجة أصيلة ما أرادته هو أن تحافظ على بيتها وأسرتها، فنزلت لتعمل منذ بداية زواجها حتى تكفي بيتها واحتياجاته وعندما احتاج زوجها مساعدتها لم تتأخر أبدا، وكانت نهاية تضحياتها ومساعدتها توجهها لمحكمة الأسرة.
قصص محكمة الأسرة..واحد قريب جوزي هو اللي قاله عليا
قالت «نسمة» في بداية حديثها: «أنا متجوزة من 12 سنة، خلفت من جوزي ولد وبنت، أنا وهو مكناش قرايب، ده واحد قريبه هو اللي شافني وهو اللي قاله عليا وبعدها جوزي اتقدملي ووافقت عليه، كان لما اتقدملي راجل عادي زي باقي الرجالة ووافقت عليه لما سألنا الناس وقالوا كويس».
حكايات محكمة الأسرة..اشتغلت في البيوت عشان أساعده
تابعت «نسمة» حديثها قائلة: «المشاكل معاه كانت من زمان وكانت بسبب إنه مبيشتغلش من زمان ولا بيصرف على البيت ولا شايل مسؤولية أي حاجة، أنا اللي كنت بشتغل في البيوت كنت بمسح وأنضف وبساعد في مصاريف البيت وعشان خاطر العيال ميكونوش محتاجين حاجة».
دعاوي محكمة الأسرة.. رافض يشتغل تاني
أضافت «نسمة»: «لحد ما جوزي جتله فكرة إنه يجيب توكتوك يشتغل عليه ومكنش معاه حقه وقتها أنا اللي اتصرفت، بيعت دهبي ودخلت جمعيات وجبتله التوكتوك عشان يشتغل عليه ويساعد في مصاريف البيت، لحد ما اتسرق قبل ما يخلص قسطه، ناس ساعدوني ورجعوه ومن ساعتها رفض إنه يشتغل عليه تاني».
قضايا محكمة الأسرة..جوزي سرقني وطفش
أنهت «نسمة» حديثها قائلة: «بعد كدة فضل يتحايل عليا عشان أجيبله عربية ب 50 ألف جنيه، استلفت من الناس وجبتله العربية، وبعدها ب 8 شهور سرقني وطفش كنت عاملة جمعية ليا خد فلوسها وخد تليفونات العيال وطفش، من ساعتها معرفش مكانه فين واخواته عارفين مكانه بس محدش فيهم راضي يقولي راح فين، وجيت ارفع عليه قضية نفقة عشان ألقي أي حاجة أصرفها على العيال لأن مبقاش معايا أي حاجة خلاص».
تابع أحدث الأخبار عبر
