أخبار محكمة الأسرة
محكمة الأسرة.. عايدة: سلفتي طفشتني عشان عينيها من جوزي
كانت محكمة الأسرة هي الحل الأخير الذي وصلت له «عايدة» بعد محاولتها العديدة في حل الأمور وديا بينها وبين والد أطفالها، الذي صدق كل الادعاءات التي كانت ضد زوجته، ولم يصدقها بعد تعرضها للظلم من زوجة أخيه الراحل التي ارادت ان تدمر بيتها وتأخذ منها زوجها وحياتها، ونجحت خطتها وأوصلت «عايدة» لمحكمة الأسرة حتى تبحث عن حقوقها بعد ترك زوجها لها.
محكمة الأسرة.. عايدة: سلفتي طفشتني عشان عينيها من جوزي
قصص محكمة الأسرة.. الحياة كانت عادية وجوزي كان زي أي راجل
قالت «عايدة» في بداية حديثها: «أنا اتجوزت من16 سنة، معايا من جوزي 3 أولاد، سايبة جوزي ومتطلقة منه بقالي 4 سنين، الحياة كانت طبيعية ومفيش مشاكل في الأول كان زي أي راجل ومفيش مشاكل منه والحياة كانت عادية».
حكايات محكمة الأسرة.. سلفتلي عينيها من جوزي
تابعت «عايدة» حديثها قائلة: «لحد ما أخو جوزي اتوفى ومن ساعتها المشاكل بدأت لأن سلفتي من ساعة ما جوزها مات وهي عايزة تتجوز جوزي، فضلت ورانا لحد ما خربت بيتنا، ولا اتجوزته هي ولا انا فضلت على ذمته».
دعاوي محكمة الأسرة.. سلفتي لفقتلي حكاية عشان جوزي يطلقني
أكملت الزوجة حديثها: «سلفتي عرفت من مرات واحد صاحب جوزي في الشغل اسرار تخص شغله وعملتله مشكلة وفهمت الناس كلها أن مراته اللي هي أنا هي السبب، وقتها محدش صدقني أني معملتش حاجة ومظلومة وجوزي مشاني أنا وولادي، وطلقني بعدها، لحد ما دوروا ورا المكالمات دي وعرفوا أنها صاحبة المكالمات وأنا مظلومة، بعدما الحقيقة اتعرفت جوزي متجوزهاش و مرجعنيش لأن أهله واقفين معاها ورافضين يخلوني أرجع بيتي لجوزي».
قضايا محكمة الأسرة.. فقدت الأمل فيه انه يحل ودي
أنهت «عايدة» حديثها: «قعدت سنة وشهرين مرضيتش أرفع قضايا عشان الأصول وهو مبيصرفش ولا بيسئل ولا راضي يجيب سكن ليا ولا للأولاد ، وماشي ورا كلام أهله اللي بيقوموه أنه ميرجعنيش، أهلي حاولوا معاه كتير إنه يتعدل ويصرف ودي من غير مشاكل، لما لقوا مفيش فايدة معاه في الآخر قالولي أرفعي عليه قضايا ده مفيش منه فايدة، وجيت رفعت قضية نفقة عشان حق ولادي».
تابع أحدث الأخبار عبر
