أخبار محكمة الأسرة
محكمة الأسرة.. كاملة: ابن جوزي سرق حقي هو وشركاته
تواجدت «كاملة» في محكمة الأسرة تبحث عن حقها الذي سرقه منه أهل زوجها وابنه من زوجته الأولى الذي استغلوا وفاة الزوج وعدم وجود ضهر أو سند لها في الدنيا وسرقوا حقوقها، وتركوها تتوجه لمحكمة الأسرة بعد محاولتها العديدة الودية وطلبها منهم الحصول على حقوقها وحقوق أبنائها تجاهلها أهل الزوج ولم يعطوها أي من حقوقها بل أرادوا أن يأخذوا ما تركه الزوج لزوجته كحق لها ولم يقدروا العشرة أو القرابة بل عاملوها معاملة الأغراب.
قصص محكمة الأسرة.. أنا وضرتي ملناش علاقة ببعض
قالت «كاملة» في بداية حديثها: «أنا اتجوزت من 15 سنة وخلفت من جوزي ولدين، جوزي كان متجوز قبلي واحدة تانية وأنا كنت أعرف وموافقة وهي كانت عارفة وموافقة، مكنش في مشاكل بيني وبينها، وجوزي كان مش مخلي واحدة فينا محتاجة حاجة كل اللي بنعوزه بيبقى عندنا، أنا وهي مكنش لينا علاقة ببعض، كنا عايشين في بيت واحد انا وهي بس كل واحدة فينا ليها شقتها وليها دورها لوحدها ومكنش في مشاكل طول ما جوزي عايش».
دعاوي محكمة الأسرة.. جوزي اتوفى فجأة وسابنا
أكملت الزوجة حديثها: «لحد من 10 سنين جوزي اتوفى وكانت صدمة عليا لأنه كان سليم ومفيهوش حاجة اتوفى فجأة وسابني أنا وعيالي، كانت صدمة عليا ومن ساعة ما اتوفى والمشاكل كلها بدأت من وقتها مكنتش أعرف اني هتبهدل كدة بعد ما اتوفى».
قضايا محكمة الأسرة.. سرقوا شركة جوزي
تابعت «كاملة»: «جوزي قبل ما يتوفى كان فاتح شركة هو واخوه وابن عمه وكانت باسمهم وشغالة كويس، لما اتوفى الشركاء التلاتة منهم ابن جوزي عملوا سجل تجاري تاني باسم شركة تانية وخدوا حقي أنا وولادي بقى قصاد المحكمة الشركة بتاعت جوزي بقت خسرانة ومليش حاجة».
حكايات محكمة الأسرة.. اخدوا ورثي وحقي
أنهت «كاملة» حديثها وقالت: «رفعت قضية ميراث لأنه مشكلتي مع ابن جوزي ومع الشركاء اللي عملوا شركة تانية جوة الشركة ومخدتش حقي أنا وولادي، من 2015 في المشاكل دي كان ليا شقق وعقارات اخدوا كل حاجة ومخدتش ولا جنية مسابوليش غير شقتي وكانوا بيطردوني منها كل شوية، بس مينفعش اخرج لأن مليش مكان تاني اروحه ».
تابع أحدث الأخبار عبر
