أخبار محكمة الأسرة
الشيطان يتعلم منها.. خالد: طردتني من البيت ورمتلي هدومي عند أمي
أمام محكمة الأسرة على عكس المعتاد تواجد رجل يبحث عن طريقة ليحصل على حقوقه؛ بسبب تعرضه للظلم من زوجته التي لم تقدر سنين العشرة بينهم وتخلت عن زوجها وطردته من بيتهم، بالرغم من أن في الأغلب تكون الزوجة هب المتوجهة لمحكمة الأسرة بسبب تعرضها للظلم من زوجها، كان الوضع في حالة «خالد» مختلف فتوجه هو لمحكمة الأسرة حتى يرى ما يستطيع فعله حتى يحصل على حقوقه من زوجته.
قصص محكمة الأسرة.. مراتي في الأول كانت مريحاني وكويسة
قال «خالد» في بداية حديثه: «أنا اتجوزت مراتي من 15 سنة وخلفنا 3 أولاد كان جواز عادي شفتها في فرح ناس قرايبي وكانت كويسة جدًا اتقدمتلها ووافقت واتجوزنا وخلفنا كل ده الدنيا كانت كويسة ومفيش مشاكل وكانت مريحاني ومش متضايق منها، معرفش امتى لكن كل حاجة اتغيرت بعد كده».
حكايات محكمة الأسرة.. الحياة على طول فيها مشاكل
تابع «خالد» كلامه: «المشاكل معاها كانت على كل حاجة طول الوقت كانت بسبب ومن غير سبب، كانت بتعمل مشاكل على أي حاجة يا إما على المصاريف، يا إما مشاكل مع أهلي، يا إما خناقات معايا أنا كانت كل يوم خناقة جديدة بستفزني لحد ما اتعصب وأخرج عن شعوري».
دعاوي محكمة الأسرة.. كنت بعديلها عشان مخربش البيت
أكمل «خالد»: «كنت بستحمل طريقتها وكلامها واللي بتعمله معايا ومعاملتها ليا اللي مكنش في حد يتحملها عشان معملش مشاكل ومخربش البيت ولا أسيب عيالي يتبهدلوا كنت بقول أمشي دنيتي عشان عيالي، وهي مكنتش بتتعدل أبدا هددتها بكل حاجة أني هطلقها وأني هتجوز عليها ومكنش بيفرق معاها حاجة.»
قضايا محكمة الأسرة.. رمتلي هدومي عند أمي
أنهى «خالد» كلامه وقال: «لحد في مرة حصل بينا مشكلة زي كل مرة على حاجة عادية مش كبيرة وخرجت رحت الشغل رجعت لقيتها مغيرة كالون الشقة ولمت هدومي كلها ورمتها عند أمي، من وقتها مش عارف أوصلها تاني مهما حاولت أكلمها معرفش عنها أو عن العيال حاجة، جاي المحكمة عشان أعرف ارفع عليها قضية ايه عشان أعرف أخد حقي منها وأعرف أشوف عيالي.»
تابع أحدث الأخبار عبر
