أخبار محكمة الأسرة
محكمة الأسرة.. سارة بدعوى تمكين: طردني وعيالي في نص الليل عشان يحشش
على أبواب محكمة الأسرة تواجدت «سارة» وعلى وجهها الحسرة والحزن، مثل العديد من السيدات الاتي أوصلهم إدمان أزواجهن للمخدرات لهذه النهاية، كان حلم «سارة» مثل العديد من البنات أن تعيش حياة طبيعية مع زوجها ومع أسرتها لكن اكتشافها إدمان زوجها للمخدرات وقسوته عليها وإهانته وطرده لها من بيتها ضيعت حلمها وأوصلتها لأعتاب محكمة الأسرة.
قصص محكمة الأسرة
بدأت «سارة» حديثها وقالت: «أنا اتجوزت من 2019، بقالنا 3 شهور متطلقين بالمحكمة بعد ما رفعت عليه قضية خلع، عرفته من الشغل اللي كنت فيه كان شخص مناسب لما اتقدملي ووافقت عليه مكملناش 6 شهور مخطوبين، في الأول كل حاجة كانت تمام وهو كان تمام بس بعد كده اتغير بقى واحد تاني غير الراجل اللي اختارته إنه يكون سند وضهر ليا في الدنيا.»
حكايات محكمة الأسرة
أكملت «سارة» حديثها متأثرة: «بعد الجواز بشهور قليلة اكتشفت إنه بيشرب مخدرات، مكنتش أعرف إنه كان بيشرب قبل الجواز، لو كنت اعرف مكنتش اتجوزته، خلفت منه أول ولد والدنيا كانت ماشية، بعد ابني التاني الدنيا خربت خالص، المشاكل كل مادي كانت بتزيد مكنش عايز يصرف.»
دعاوي محكمة الأسرة
تابعت الزوجة وتذكرت ما حدث معها في حياتها والدموع في عينيها: «كنا على طول في مشاكل بسبب أنه مبيشتغلش ومبيصرفش وفلوسه كلها على المخدرات وفي كل مرة أطلب منه فلوس كان بيطردنا من البيت، حاولت كتير معاه إنه يتعدل لكن مفيش فايدة، حتى أهله كانوا بيقولوا هنعمل ايه مش قادرين عليه ويدوله فلوس وكان بيصرفها على المخدرات ويسبني أنا والعيال من غير ولا مليم.»
قضايا محكمة الأسرة
أنهت «سارة» حديثها قائلة: «أخر مرة طلبت منه فلوس عشان أجيب أكل طردني أنا والعيال من البيت عشان يشرب مخدرات براحته طردني الساعة 12 وقالي ده اللي عندي إذا كان عجبك، ساعتها قررت اسيبه ومرجعلوش تاني أبدا لأني خلاص تعبت منه، خدت عيالي ورحت عند أهلي ومن ساعة ما مشيت مسألش في أنا والعيال وسايباه أكتر من سنة، ولأنه كل شوية يطردني رفعت عليه قضية تمكين عشان أخد حقي أنا وولادي».
تابع أحدث الأخبار عبر
