خلود في محكمة الأسرة: خنقني وكان هيموتني عشان هجيب بنت تالتة
زواج صالونات كانت بداية قصة زواج «خلود» ومحكمة الأسرة كانت نهايتها التي وصلت لها «خلود» حتى تنقذ نفسها وبناتها من مستقبل لم تعلم خفاياه مع زوجها الذي اتسم بالقسوة على أهل بيته.
تزوجت «خلود» في بداية عشريناتها، واكتشفت أن زوجها متمسك بأفكاره الرجعية القديمة فكان لا يريد إنجاب بنات وجعل زوجته تدفع ثمن انجابها لثلاث بنات كأنها لها يد في هذا الأمر، وحول كل مرة حملت فيها «خلود» وانجبت بناتها تجربة أليمة يملأها الحزن بدلا من أن تكون ذكرى جميلة، وزاد في عنفه اتجاهها وتعاطيه للمخدرات حتى قررت أن تهرب من عذابها مع زوجها حتي تنقذ نفسها وبناتها، وقررت رفع دعوى خلع ونفقة حتى تحصل على حريتها وحقوقها.
جوزي عايز الولد
قالت «خلود»: أنا اتجوزت جواز صالونات جوزي كان كويس في أول الجواز ومفيش مشاكل، لما خلفت المشاكل كلها بدأت، جبت بنتي الكبيرة كان عادي المشاكل بينا كانت العادية على المصاريف بس، كان نفسه فيس ولد وأنا كنت عارفة كدة.
حشاش من زمان
تابعت «خلود»: حملت تاني وخلفت بنت ساعتها قالي جبتي بنت ليه انا عايز ولد قلتله ده أمر الله مش هنعترض عليه، عمل معايا مشاكل كتير ساعتها وعيشني في نكد، وبدأ بقى في الضرب والإهانة، كان كل شوية يضربني وكان بيشرب مخدرات من زمان وأنا عارفة بس كان أخر الحشيش بس زاد مع الوقت.
خنقني قدام بناتي
أضافت «خلود»: الضرب والشرب وصلوا انهم بقوا كل يوم وكل لما امشي واسيب البيت امي تروحني، في بنتي الأخيرة كنت حامل في شهرين لما سيبته، لما عرفت اني حامل ورحت قلتله قالي دي اكيد بنت قلتله انا حاسه انها بنت راح ضربني وخنقني قدام العيال كان هيموتني، ساعتها قررت اسيبه ومرجعلوش تاني.
دعوى خلع ونفقة
أنهت «خلود» كلامها: بنتي الصغيرة مسجلهاش ولدتها عند والدتي، ومسألش فينا من ساعة ما مشينا، رفعت عليه قضية خلع ونفقة عشان حقي أنا وبناتي وأعرف أعوضهم عن اللي شافوه مع أبوهم أنا سيبته عشان كنت خايفة ممكن يعمل معايا ايه وبعد كدة ممكن يموتني ويموتهم.
تابع أحدث الأخبار عبر
