«جسمي كله حروق».. مريم في دعوى خلع: المخدرات خلته يتلذذ بلسعي بالمعلقة
انقلبت الحياة الزوجية رأسًا على عقب منذ معرفة الزوج الطريق الذي يدمر علاقات كثير ألا وهو طريق المخدرات، حاولت التأقلم والتعايش مع هذا الوضع ولكنها وجدت أنه من الصعب أنها تكمل حياتها مع زوج مدمن تصدر منه تصرفات غير متوقعة نتيجة لتغيب عقله مثل حرقها بالمعلقة، ما دفعها تلجأ لرفع قضية خلع.
"جسمي معلم بسبب حرق ليا بالمعلقة".. هكذا بدأت مريم قصتها لقاضي محكمة الأسرة مؤكدة على معاناتها مع زوج قاسي عديم القلب والشعور، تضيف إلى حديثها قائلة: "في أول الجوز والدنيا كانت تمام بينا ومفيش أي مشاكل خالص، كان بيبقى المشاكل العادية الموجودة في أي بيت بس بقاله فترة كبيرة متغير معايا وقتها لاحظت وقلت أكيد في حاجة، بس لما جيت أكلمه واقوله إيه الل مغيرك قال لي لا مفيش حاجة".
حياتنا اتشقلبت من ساعة ما عرف طريق المخدرات
تمادى الزوج في معاملته الجديدة لها وقررت البحث وراء السر وعندما بحثت علمت أن المخدرات التي احتلت حياته هي السبب في كل المشكلات التي تعاني منها، في البداية ظنت أنه الأمور ليست تكون بالحد الذي تعيش فيه الآن.
تستكمل الزوجة قصتها للقاضي: "لما لقيته على طول خناقات وأسلوبه متغير معايا خالص كنت متأكدة إن أكيد في حاجة بس لما دورت وراه عرفت إنه بيشرب مخدرات، تصدم عشان مكنتش اعرف حاجة عن الحاجات دي خالص بس أكيد صحاب السوء هما السبب"
تابعت مريم: "بقينا نتخانق كتير أوي بالذات لما يقول لي أنا نازل القهوة، كنت بحاول أخليه ميشوفش صحابه اللي خلوه يعرف طريق الشرب دا، ولما لقيته مش فارق معاه حاجة ومكمل في طريق القرف دا الخناقات زادت وسبت البيت كتير بس كل مرة يوعدني إنه خلاص هيبطل".
بيلسعني بالمعلقة
تصاعدت المشكلات ما جعلها تقرر الانفصال الحتمي عندما اتجه الزوج لطريقة جديدة ألا وهي حرقها بالمعلقة، تتابع قصتها: "كان بيضربني الأول بإيده عادي بس بقاله فترة كل ما نتخانق يجيب المعلقة ويسخنها على النار ويحرقني بيها"، اختتمت قائلة: " كررها أكتر من مرة لحد ما بقى جسمي كله معلم بالحرق، قلت مبدهاش بقا مش هينفع اصبر أكتر من كدا، هيعمل فيا إيه تاني، رفعت عليه قضية خلع بقالي 4 شهور ولسة ماشية في الإجراءات".
تابع أحدث الأخبار عبر
