هدى في دعوى نفقة: بيشغل عيالي اللي في المدرسة عشان يصرفوا عليه
تزوجت «هدى» من قريب لها وكانت تظن أنها تعرفه وتعرف طباعه وسلوكه وبعد سنين العشرة وتحمل طباع زوجها الصعبة وبخله عليها وعلى أولادهم، اضطرت أن تلجأ لمحكمة الأسرة لتحصل على حقوقها منه.
سنين عاشتها «هدى» مع زوحها ومنذ بداية زواجهم اكتشفت أن زوجها يبخل عليها ولا يصرف عليها أو على أولادهم ما يكفيهم، وبسبب عادات وتقاليد بلدهم اضطرت أن تتحمل زوجها وتعيش معه حياة صعبة، لكن عندما فاض بها الكيل ولم تجد أي حل مع زوجها قررت أن تلجأ لمحكمة الأسرة بدعوى نفقة لتعطي أولادها الحياة التي يستحقوها.
استحملت العيشة معاه 15 سنة
قالت «هدى»: اتجوزت وأنا صغيرة من واحد قريبي وفضلت متجوزاه من 15 سنة، كنا نعرفه كويس ولما اتجوزته كنت فرحانه أني هبقى عروسة مكنتش أعرف أن نهايتي هتبقى كدة وأجي أرفع عليه قضايا في المحكمة، خلفت منه 4 عيال وكان أملي في الحياة إني أعيش وأربيهم، وحاولت كتير إني موصلش للنهاية دي عشانهم.
مبيصرفش غير اللي على القد
تابعت «هدى»: من أول جوازنا وهو مبيصرفش علينا ولو صرف بيصرف على القد وبس، وحاولت كتير معاه أنه يصرف أكتر لكنه بيقول معهوش وده اللي عنده، مكنتش عارفة أعمل أيه فعيشت وسكت معنديش حل تاني، احنا معندناش طلاق في بلدنا، مكنتش أقدر حتى إني اشتغل وأصرف على ولادي لأن عندنا مفيش ست بتشتغل وتصرف.
بيخلي ولادي يشتغلوا وهو ينام في البيت
أكملت «هدى» كلامها وقالت: هو كان شغال سواق، ولما المصاريف زادت كان بيشغل ولادي اللي في المدراس في الورش عشان يجيبوا مصاريف وهو ينام في البيت، خفت على مستقبل ولادي لأنه عايزهم يسيبوا المدرسة، وهو مش همه حاجة وبقى مبيصرفش علينا خالص.
المخدرات مضيعه فلوسه
أضافت «هدى»: لحد ما اكتشفت انه بيشرب مخدرات وهي اللي مضيعة فلوسه، سيبتله البيت من قريب عشان ألحق نفسي أنا وولادي لما لاقيت مفيش فايدة معاه، ورفعت عليه قضية نفقة صغار ونفقة زوجية، ومرفعتش خلع لأني مش عايزة أتطلق وعايزة أعيش وأربي ولادي وهو يمكن ربنا يهديه ويبقى أحسن ويرجع تاني، وبقالي فترة في المحاكم ومخدتش حاجة لسه.
تابع أحدث الأخبار عبر
