عشان فلوسها.. نورا: بعد ما صرفت عليه رماني ولف على واحدة تانية
8 سنوات من اللامبالاة يعيشها الزوج ناحية زوجته وأولاده، فكانت الزوجة هى المسئول الأول والأخير عن عش الزوجية الذي سكنته المشكلات من بداية الزواج، حاولت الزوجة عدم الالتفات له وتوجيه كل تركيزها على أولادها فقط.
محاولات تبوء بالفشل في كل مرة تحاول فيها مسايرة زوجها وتصرفاته، وعدم اعتمادها عليه في أي مسئولية، وظنت أنه يقدر كل ما تفعله معه هو وأولادهما، ولكنها وجدته لا يعرف أي شيء عن التقدير، عندما تزوج من امرأة أخرى لتنفق عليه.
شايلة البيت كله على كتفي من أول الجواز
استهلت نورا حديثها قائلة: "من أول جواز وهو مبيصرفش جنيه عليا، حتى بعد ما خلفت مبيصرفش برضو، وأنا اللي بشتغل وشايلة مسئولية البيت كلها على كتفي، وهو ميعرفش أي حاجة عن العيال ولا عن المصاريف"، تابعت: "مشاكل كتير بتحصل كل شوية وكنت بحاول أخليه ينزل شغل عشان العيال بس هو مش فارق معاه أي حاجة هو عايز يقعد ميعملش أي حاجة وحد تاني هو اللي يصرف".
مفكرتش في الطلاق ولا مرة
لم تخبر الزوجة أي أحد بأنها هي المسئولة عن المنزل، وهي الوحيدة المتكفلة بمصاريف الأولاد والزوج وحدها والزوج لا يفعل شيء سوى جلوسه بلا عمل، ظل هذا الحال لمدة 8 سنوات كاملة، لم تشتكي الزوجة لأنها أرادت المحافظة على عش الزوجية، ولكن الزوج لم يفرق معه أي شيء، وذهب من أجل الزواج من أخرى ليتجرد من أي مسئوليات ويبتعد عن المنزل نهائيًا، تابعت نورا: "كنت صابرة ومستحملة كل حاجة ولا عمري اشتكيت منه، وكل اللي كنت بفكر فيه هو العيال والشغل كان بيجيب لي فلوس كويسة بصرف بيها على العيال وعليه، كان عندي أمل إنه يتغير وينتبه للبيت بس عدت سنة ورا التانية وهو قاعد في البيت مبيعملش أي حاجة وأنا اللي بصرف".
راح اتجوز واحدة تانية تصرف عليه
قال الزوج للزوجة في يوم إنه عليه الذهاب لصديقه لأنه مريض، لم تمانع على أساس أنه يعود للمنزل في نفس اليوم ولكن فات يوم وراء يوم والزوج لم يأتي، حاولت التوصل له أكثر من مرة ولكنها فشلت، استكملت قائلة: "قال لي في يوم إنه رايح يزور واحد صاحبه وراح فعلًا، ومجاش خالص كلمته في التليفون كان مغلق وأنا معرفش هو عند مين، عدى يوم واتنين وهو مجاش، وبعد أسبوع لقيته بيكلمني وبيقول لي أنا اتجوزت".
أنهت حديثها: "معرفتش أقوله إيه وطلبت منه الطلاق، بس هو رفض وقال لي هخليكي كدا، لما لقيت مفيش فايدة رفعت قضية طلاق بقالي 3 أشهر".
تابع أحدث الأخبار عبر
