نوال أمام محكمة الأسرة: "متجوز علي بقاله 3 سنين وأمه مدارية عليه"
أحد عشر عامًا تحملت فيهم الزوجة بخل زوجها، والمشكلات والخلافات التي كانت تفتعلها والدته بدون مبرر، وكان السبب الوحيد الذي يجعلها صابرة على حياتها طوال هذه السنوات هو أولادها الثلاثة، ورغم تحملها طوال هذه السنوات كان الطلاق هو الحل الأمثل بعدما علمت بزواجه من أخرى، وكان أهل الزوج يعلمون بزواجه إلا الزوجة آخر من يعلم.
خطت نوال أولى خطواتها نحو محكمة الأسرة ورفع دعوى نفقة على طليقها بسبب رفضه الإنفاق على أولاده، استهلت حديثها قائلة: "استحملت قرفه لمدة 11 سنة وهو مش راضي يصرف علي أنا والعيال، وكنت بقول معلش يمكن ظروف، شوية أروح لأهلي عشان أخد فلوس وشوية لأهله، وبعد فترة أهله رفضوا يدوني أي حاجة ومبقاش عندي أي حد غير أهلي بس".
مستحملة قرفه وبخله بقالي 11 سنة
أضافت: "حصلت خناقات كتير وكل مرة الأهالي كانت بتحل الموضوع، وكنت برجع وبمشي الدنيا عشان خاطر العيال وعشان مخربش البيت بس هو بيتمادى، دا غير المصيبة اللي عرفتها مقدرتش أكمل معاه حياتي خلاص".
مشكلات كثيرة حدثت من بداية الزواج، كانت تتغاضى عنها الزوجة من أجل استمرار الحياة الزوجية ولكن كان خبر زواجه هو الضربة القاضية التي جعلتها تطلب الطلاق على الفور، أكملت حديثها: "كل مرة كنت بفكر في الطلاق بس برجع أقول حرام عشان خاطر العيال وفضلت مكملة معاه، حتى في أيام تعبه كنت أنا الوحيدة اللي واقفه جمبه رغم معاملته اللي زي الزفت معايا من أول الجواز".
متجوز علي بقاله 3 سنين
أضافت: "تعب جامد وعمل عملية وقال لي أنا عايز اقعد عند أمي كام يوم، قلت له ماشي، ورابع يوم العملية نزلت الصبح أشوفه لقيته مش موجود سألت أمه قالت لي راح عند واحد صاحبه، أنا استغربت الموضوع".
تابعت نوال: "لقيت سلفتي جت قالت لي أناعايزة أقولك حاجة كلنا عارفينها معادا إنتي، قلتلها إيه قالت لي على فكرة جوزك متجوز عليكي بقاله 3 سنين، وهو راح عند مراته التانية دلوقتي".
دعوى نفقة
كان أول رد فعل لها هو طلبها للطلاق، حاول الأهل إقناعها بالرجوع عن قرارها، ولكنها أصرت وبالفعل تم الطلاق لتتخلص من حياتها الحزينة، التي تحملتها 11 عامًا بدون جدوى، أنهت الزوجة قصتها: "أهلي كانوا عايزين يرجعوني ليه تاني بس أنا صممت على الطلاق واتطلقنا فعلاً، وكنت فاكرة هيراعي ربنا في عياله، بس من ساعة ما اتطلقنا وهو مبعتش جنيه واحد، ولما لقيته عامل نفسه عبيط، رفعت عليه قضية نفقة بقالي شهر ونص".
تابع أحدث الأخبار عبر
