سارة في دعوى نفقة: ابني جاله صدمة عصبية بسبب أبوه
في بداية حياتها وقعت «سارة» في حب ابن عمتها تزوجته وظنت أن حياتها تغيرت وأنها ستبني أسرتها مع زوجها وتربي أطفالها في بيتها مع من اختاره قلبها، ولكن منذ الخطوبة بدأ التحكم منه وزادت المشكلات بعد الزواج حتى انتهى الأمر بها في سن الـ 25 في محكمة الأسرة رافعة دعوى نفقة حتى تستطيع أن تصرف على ابنها.
تزوجت سارة من ابن عمتها لمدة سنتين فقط أنجبت منه طفلا وتركته منذ سنة لأنها لم تستطع تحمل حياة لم تكن تعامل بها كفرد له حريته ولكن كانت تعامل على أنها عبدة وإنسانة بلا عقل ورأي وشخصية.
«سارة»: حاولت بكل الطرق إني أكمل مع جوزي
قالت «سارة» من أمام محكمة الأسرة على مشكلتها مع زوجها: المشكلات بينا كانت طبيعية وموجودة من قبل الخطوبة لكن كترت جدا بعد الجواز لحد مقدرتش استحمل، كانت بيتحكم ويتدخل في كل حاجة، مكنش بيحترمني ولا بيهتم بيا أنا وابنه مبيصرفش علينا غير بحدود، خصوصيتنا بيحكيها لأهله الناس بتدخل في حياتنا طول الوقت، مكنش عايز يخلي معايا موبايل، مش عايزني أزور صحابي او حد يزورني ولا يبقى ليا علاقة بأي حد.
لم تكشف سارة عن سبب انفصالها عن زوجها فسرت أن السبب كان خاص جدا ولم تسطع أن تفشيه وأنه مهما حدث بينها وبين زوجها فهو مازال ابنه عمتها وأبو ابنها ولا تريد أن تسبب له أي حرج أو مشكلة "محدش من أهلي عارف سبب الطلاق كله عارف إني اتطلقت عشان زهقت منه ومبقتش قادرة أكمل، حتى المحامي نفسه ميعرفش سبب الطلاق لأنها حاجة محرجة إني اتكلم فيها".
«سارة»: كنت بقول لجوزي أقوله مش هينفع اتكشف على اخواتك ومبيهتمش
أضافت «سارة»: حاولت كتير إني أوصل معاه لحل وسط لكن المشاكل دايما كانت موجودة ومكنش في بينا أي تفاهم، المشاكل بانت أكتر من بعد الحمل مش عايزني اكشف مع أمي وعايزني أخد حد من أخواته وكنت بتكسف إني أروح معاهم أقوله مش هينفع اتكشف على اخواتك لكنه مكنش بيهتم، غير طبعا إنه كان مبيصرفش علينا وأهم حاجة يصرف على نفسه، كان بيخبي مني الفلوس.
تابعت «سارة» متأثرة بما وصل له حالها هي وإبنها: ابني دلوقتي عنده سنة ونص أبوه كان مبيتحملش المسئولية كنت أنا اللي باخد ابني يكشف هو يقعد مع صحابه وميجيش معاي، معاملته جافة معاه ومكنش بيشوفه، وفي مرة كان بيزعق وعامل مشكلة كبيرة من ساعتها ابني عنده صدمة وأي صوت عالي بيخوفه ويوتره حتى لو صوت ضحك وهزار بيخاف منه ومش عارفة هيتحسن ويبقى طبيعي ولا لأ، اتطلقت لما ملقتش حل ومبقاش في حاجة أبقى عليها خلاص.
تابع أحدث الأخبار عبر
