«بناتي ليهم كلمة عنه».. مروة في دعوى طلاق: "أمه بتسخنه عليا من تحت لتحت"
مشكلات بدأت من الشهر الأول في الزواج، كان السبب الرئيسي هو تدخل الأهل في الحياة الزوجية بين الزوجين بطريقة لم تتحملها الزوجة وطلبت الطلاق عدة مرات بسبب حياتها التي أصبحت مشاع لأهله، بالفعل تم الطلاق مرة واحدة من قبل ولكن الزوج أراد الرجوع مؤكد على عدم تدخل أي شخص في حياتهما ولكن عاد كل شيء لعادته ما جعلها تلجأ لرفع دعوى طلاق للمرة الثانية.
"بتاع أبوه وأمه".. بدأت مروة قصتها بهذه الكلمات التي توضح انعدام الشخصية لدى الزوج وانسياقه وراء حديث أهله الذين يتدخلون في كل شيء بطريقة مبالغ فيها جعلت الزوجة تترك المنزل عدة مرات طلبًا في الخلاص من حياتها التي فقدت خصوصيتها.
تابعت مروة: "من أول شهر في الجواز وفي مشاكل بينا بسبب أهله إلى بيتدخلوا في كل حاجة وهو ماشي وراهم من غير ما حتى يقول رأيه، صح غلط ماشي وراهم وخلاص".
أضافت: "بيبقى متفق معايا على حاجة وأول لما يروح عند أبوه وأمه ويقولوا له لا متعملش كذا على طول يمشي وراهم ومش مهم اللي بقوله، دا غير إنه أمه بتسخنه عليا من تحت لتحت من غير ما حد يلاحظ".
أمه بتسخنه عليا من تحت لتحت
تصاعدت المشكلات بينهما بسبب تدخل والديه المستمر في كل الأمور بينهما فكانت الزوجة صابرة على حياتها معه من أجل أولادها والحفاظ على عش الزوجية، أكملت مروة حديثها: "خلفت بنتي والتانية وبرضو لسة زي ما هو والحياة زي ما هو، وكنت كل ما أجي أطلب الطلاق أمي تقولي حرام عليكي بناتك وكنت برجع كل مرة عشانهم، كل شهرين بقيت أسيب البيت بسبب المشاكل اللي بتعملها أمه".
تابعت: "أمه بتشاكلني كل يوم في الطالعة والنازلة وبتشتمني كمان وكل لما أجي أقوله أمك بتغلط فيا بيكدبني، وأنا مبقتش عارفة أعمل إيه رحت رفعت قضية طلاق للضرر وكسبتها وانفصلنا خلاص".
كنت فاكرة لما اتطلق وارجع تاني هيتغير
ما زالت «مروة» قصتها قائلة: "قعدت عند بيت أهلي سنة وطلب يرجع وأنا مكنت موافقة بس أمي قالت لي ارجعي عشان خاطر بناتك، وهو وعدني إنه هيتغير ومش هيخلي حد يتدخل، رجعت كنت فاكراه اتغير خلاص بس للاسف مفيش حاجة اتغيرت بالعكس الموضوع زاد".
أنهت حديثها بهذه الكلمات: "معندوش شخصية الحاجة اللي بيتفق معيا عليها بمجرد ما حد من أهله بيكلمه بيغير رأيه على طول، عشان كدا جيت رفعت قضية طلاق بقالي 3 شهور"، ولا تزال القضية منظورة في المحكمة حتى الآن.
تابع أحدث الأخبار عبر
