مش عايز يشتغل .. نهى بـ دعوى خلع: سابني وهرب في حملي
دعوى خلع لجأت إليها نهى بعدما أدركت أنها أخطئت الاختيار في بداية الأمر، وأنها لم تنجح في إصلاحه بعد الزواج مثلما ظنت، لأن بدلًا من أن الأمور تتحسن ازددت سوء، ووصل به الحال إنه هرب من المنزل لأنه لا يريد سوى التكاسل عن العمل وتعاطي المخدرات.
نهى بـ دعوى خلع: سابني وهرب في حملي عشان مش عايز يشتغل
"كنت بقول بعد الجواز هيتغير" بهذه الكلمات بدأت نهى تروي قصتها للقاضي في دعوى خلع أقامتها بمحكمة الأسرة، مؤكدة على معاناتها مع زوجها من قبل الزواج ولكن كانت تظن أن الحال يتحسن بعد الزواج ولكنها مخطئة لأن الوضع ازداد سوء، أضافت: "هو سواق توك توك عندنا في المنطقة ومعروف إن كل السواقين بيشربوا مخدرات، بس لما عبده جه أتقدم لي وافقت على الخطوبة وأهلي كانوا رافضين الموضوع بس أنا صممت واتخطبتله وقولت بعد الجواز هيتغير ويبطل القرف اللي بياخده دا"
تابعت: "اتجوزنا وكان أول شهر تمام بس بعد كدا بقا يسهر كتير ويرجعلي نص الليل كل يوم، كنت بقول اسيبه براحته عشان مبقاش بخنقه بس لما الموضوع زاد كلمته وقالي عادي بقعد مع صحابي"، أكملت: "كنت فاكرة إنه بيشرب تفاريحي بس كدا مش إدمان بس لاحظت إن تصرفاته اتغيرت معايا وبقا عصبي جدَا وكل ما أجي أكلمه في أي حاجة يتعصب ويمد إيده".
ازداد الوضع سوء بعد الزواج
ظنت الزوجة أنها فترة مؤقته وأنه سينصلح حاله، لكنها اكتشفت أنه يزداد سوءً مع مرور الوقت بالإضافة إنه تكاسل عن العمل، أضافت: "مبقاش عايز ينزل الشغل ويا إما قاعد في البيت أو في القهوة، وأنا بقيت حامل ومبقاش في مصاريف وهو ولا في دماغه كلمته وقولتله ينزل الشغل عشان ابننا اللي جاي في الطريق قالي أنا مش هعمل حاجة"
تابعت الزوجة: "غضبت عند أهلي عشان يحس وينزل يشتغل عشان ابنه، برضوا لسه قاعد في البيت واخواتي اتكلموا معاه عمل معاهم مشكلة كبيرة، أهلي اتكلموا معاه تاني براحة عشان الموضوع ميكبرش، واتفقوا معاه إنه هيشتغل وقالي ماشي"
أكملت نهى قائلة: "بعد ما أهلي اتفقوا معاه إنه هينزل الشغل قولت ارجع البيت ورجعت لقيته مش موجود في البيت، قلت يمكن في الشغل فضلت مستنياه طول اليوم مجاش كلمته على الموبايل مقفول ومش عارفة أوصله وأنا مش فاهمة هو فين، كلمت أخويا وجه خدني"
أنهت حديثها: "فضلت عند أهلي أسبوع واتنين وهما بيحاولوا يوصلوله ومش عارفين برضو ولما لقوا إن مش عارفين نوصله، رفعنا قضية خلع بقالي 3 شهور"، ولا تزال دعوى خلع نهى منظورة في المحكمة حتى الآن.
تابع أحدث الأخبار عبر
