رفع عليا مطواة .. أسماء في دعوى الخلع: باع الأنبوبة عشان الكيف
لم تفرح الزوجة بعش الزوجية الجديد سوى فترة قصيرة فقط لتتفاجأ بزوجها الذي تحول لشخص أخر منذ أن اتجه لطريق المخدرات وتحول معه عش الزوجية السعيد لبيت بائس بسبب تصرفات الزوج ما دفعها ترفع دعوى الخلع.
أسماء في دعوى الخلع: باع الأنبوبة عشان الكيف
"صحابه خربوا بيتي" بهذه الكلمات بدأت أسماء حديثها عن مأساتها مع زوجها الذي تحول لمدمن بعد أن كان الجميع يشهدون بأخلاقه وأدبه، مضيفة: “ تعرفت على جوزي في الشغل ولما عرفته كويس حبيته وهو كمان حبني وجه تقدم لي واتخطبنا سنتين وكانت فترة الخطوبة من أحسن الفترات وكان كويس جدًا معايا وكان في المنطقة كل الناس بتحلف بأخلاقه”.
تابعت في دعوى الخلع: "اتجوزنا ولحد أول 3 سنين كان كويس وكل حاجة تمام ولما خلفت ابني كان حنين أوي عليه وكل اصحابنا بتحسده على معاملته لابنه، مكنش ليه في السهر على القهوة والكلام دا بس بدأ كل يسهر وميرجعليش غير وش الفجر".
سرقة الزوج لأغراض البيت
تعجبت الزوجة من تصرفات الزوج التي تحولت في غمضة عين وأصبح رجل أخر غير الذي عرفته، تابعت: "بقا واحد تاني ومعاملته اتغيرت معايا ومع ابني في الأول كنت بقول يمكن ضغط شغل بس لما لقيت الموضوع زاد قلت أكيد في حاجة، بدأت الاحظ إن في حاجات بتختفي من البيت ولما أسأله عليها يقولي مشوفتش حاجة".
أضافت: "الموضوع اتكرر كتير وكل حاجة بقت بتختفي من البيت حتى أنبوبة البوتاجاز مش لقياها، مكنتش فاهمة الحاجات دي بتروح فين ومين اللي بياخدها لحد ما اكتشفت إن هو اللي بياخد الحاجات دي ويبيعها عشان يجيب مخدرات".
تحول الزوج من رجل صالح لمدمن لا يرى أمامه سوى الكيف ما دفع الزوجة لرفع دعوى خلع والتخلص من زوجها المدمن قبل أن يتطرق الأمر للقتل، أضافت أسماء: "بقينا بنتخانق كتير طول الوقت على أي حاجة لحد ما زهقت وبقيت اسيب له البيت كتير واروح عند أهله عشان ضربه فيا ليل ونهار ولما أرجع بيرجع برضوا لقلة أدبه تاني، وأخر خناقة ضربني في الشارع ولقيته رفع عليا مطواة".
اختتمت حديثها: "أهلي خدوني عندهم وطلبوا منه الطلاق بس هو رفض وقال مش هطلق، لما لقيته مصمم ميطلقش رفعت قضية خلع عليه بقالي سنة" ولا تزال دعوى الخلع منظورة في المحكمة حتى الآن.
تابع أحدث الأخبار عبر
