منى في دعوى طلاق: بعد ما وقفت جمبه راح اتجوز واحدة تحشش معاه
قصة حب دامت 7 سنوات تحمل كل معاني الرحمة والمودة والتعاون بين الزوجين والسعادة المتناهية التي سكنت عش الزوجية، ولكن تحول البيت السعيد لجحيم وتحول معه الزوج المثالي لمدمن بعد ما عرف طريق المخدرات وانقلبت حياتهم رأسا على عقب، ما دفع الزوجة لرفع دعوى طلاق والتخلص من حياتها التي أصبحت تعيسة بعد ما كانت وردية.
«اتجوزنا عن قصة حب كبيرة»، استهلت «منى» قصتها الحزينة، أضافت: «كان جارنا وأنا كنت عيلة في ثانوي وحبينا بعض وجه اتقدم لي وأهلي وافقوا والحمد لله اتخطبنا والخطوبة مطولتش واتجوزنا بعدها على طول وكنا مبسوطين وكانت كل حاجة تمام».
تابعت منى: «حتى لما كانت الظروف مبتبقاش كويسة كنت بستحمل وكنت بنزل كمان اشتغل عشان أساعده في المصاريف، مكنتش بشتكي لأهلي ولا أي حد كان يعرف عننا حاجة عشان أهلي ميعملوش مشاكل».
لاحظت الزوجة تغير معاملة زوجها لها ولكنها لم تهتم للأمر في لبداية ولكن عندما تمادى الزوج بدأت تدرك أن هناك شيئا غامضا لابد أن تعرفه، أضافت: «سنتين الخطوبة وأول 5 سنين مكنش فيه مشاكل وكان بيعاملني أحسن معاملة بس بقاله سنة متغير معاي ومبقاش يحب يأكل معايا ولا يقعد معايا حتى لما ابنه يجي يلعب معاه يسيبه ويقوم».
ضمدت الزوجة وشرد ذهنا في أيام السعادة الزوجية قبل أن تعود للحوار: «وفي أول الجواز مكنش بيحب السهر فجأة بقى يحب يسهر ويقعد برا أكتر ما بيقعد في البيت وشكيت إنه بقى يشرب مخدرات، ولما قلت له إيه اللي غيرك.. قالي مفيش حاجة ومد إيده علي وكان أول مرة يعملها من الجواز».
صدمة الزوجة في حبها الوحيد
شكت الزوجة أنه من الممكن على علم بأخرى ولكنها كانت لم تصدق الفكرة بسبب حبهما الذي يشهد به الجميع ولكن اكتشفت الصدمة، أضافت: «لما بقى يسهر بره كتير ومبقاش يحب يقعد معايا شكيت إنه ممكن يكون يعرف واحدة تانية بس كنت دايمَا بقول لأ أحمد ميعملش كدا، لكن جه في يوم اتخانقنا بسبب معاملته اللي مبقتش قادرة استحملها ولقيته مرة واحدة طردني أنا وابني وقالي روحي عد بيت أبوكي».
تابعت: «كنت مصدومة بس خدت ابني ومشيت قولت عشان مفيش مشاكل تحصل وروحت عند أهلي وعدى أسبوع واتنين وتلاتة وهو مسألش فيا وبعد شهرين عرفت إنه اتجوز علي واللي عرفته إنها مش مظبوطة وبيقعدوا يحششوا مع بعض».
بعدما أخذت الزوجة صدمة عمرها طلبت الطلاق ولكنه لم يوافق، اختتمت منى حديثها: «طبعًا بعد ما عرفت طلبت منه الطلاق ومبقتش عايزة أعيش معاه يوم واحد بس قالي أنا مش هطلق، جيت رفعت قضية طلاق بقالي شهرين».. ولا تزال القضية منظورة في المحكمة حتى الآن.
تابع أحدث الأخبار عبر
