ولاء في دعوى خلع : قالي رايح اتغدى عند أمي وقعد سنتين
لجأت ولاء إلى محكمة الأسرة لرفع دعوى خلع بعد ما أدركت أن زوجها لا يصلح أن يكون رب منزل وقدوة لأولاده بعد أن تركهم بلا سؤال أو مصروفات.
ولاء في دعوى خلع : قالي رايح اتغدى عند أمي وقعد سنتين
"منعرفش عنه حاجة" بهذه العبارة بدأت ولاء حديثها لتروي قصتها للقاضي، مؤكدة على تغير الزوج وتركه المنزل وإهماله لأولاده، أضافت: «متجوزين بقالنا 10 سنين والحمد لله كنا مبسوطين وأنا وهو شغالين عشان نعرف نصرف كويس على العيال وبنشارك بعض في كل حاجة».
وأضافت ولاء: «في أول الجواز كان بيصرف ومبيبخلش علينا بأي حاجة بس بقاله فترة كبيرة مش عايز يصرف ولو ساب لي فلوس بيبقى بالخناق وأكتر حاجة بيسيبهالي 50 جنيه، كنت بقول مش مشكلة وأنا اللي أكمل باقي المصاريف من معايا وفضلت كدا كام شهر بس مصاريف العيال كتير ومصاريف العيال بتاعة المدرسة مش عارفة ادفعها".
هروب الزوج من المنزل والمسئولية
ظنت الزوجة أنها تكون فترة طارئة على الزوج بسبب ظروف عمله ولكن الوضع تمادي وأصبح أمر واقع وعبء على الزوجة بالإضافة إلى أنه ترك المنزل وذهب لبيت أهله ما دفع الزوجة تطلب الانفصال، أضافت: «كل لما أتكلم معاه في موضوع المصاريف وإنه يسيب لي فلوس ألاقيه بيقول لي ظروف الشغل كنت بسكت وبقيت استلف من الناس عشان أعرف أصرف على البيت وهو ولا في دماغه».
تابعت في دعوى خلع: "جه يوم وهو في الشغل قالي أنا هروح اتغدى مع أمي قولتله ماشي كنت بحسب هيرجع عادي علطول، لقيته بيكلمني بليل وبيقولي أنا هبات عندها قولت مش مشكلة، بس عدا يوم واتنين وهو مكلمنيش حتى، فكلمته أشوفه قالي أنا هقعد عند أمي فترة".
تركت زوجها على راحته دون تحكم ولكنها لا تعلم أنه يذهب ولم يعد مرة أخري للمنزل، أضافت: «كلمته بعد أسبوع لقيته بيقولي أنا مش راجع البيت تاني قولتله طب وعيالك قالي اصرفي عليهم انتي، وأمه كلمتني قالتي ابني مش هيرجعلك انتي منكدة على ابني».
تابعت: «سبته فترة وأهلي حاولوا يكلموه يرجع عشان العيال وهو مصمم ميرجعش، ومش راضي يبعت أي مصاريف لعياله حتى الطلاق مش راضي يطلق ومش عارفة هو عايز إيه، بقاله كدا سنتين معرفش عنه حاجة»، لذا لجأت ولاء لمحكمة الأسرة بالجيزة ورفع دعوى خلع منذ 3 شهور ولا تزال القضية منظورة حتى الآن.
تابع أحدث الأخبار عبر
