حماتي خربت البيت.. عزة في دعوى تمكين: أمه متحكمة في كل حاجة
دعوى تمكين اضطرت إليها عزة، والتي أرجعتها إلى سبب جوهري وهو: «أمه هي اللي ممشيه البيت»، متحدثة عن معاناة مستمرة منذ 12 عامًا.
عزة في دعوى تمكين: أمه متحكمة في كل حاجة
12 عامًا من تدخل الأهل المستمر في الحياة الزوجية، ما أدى لوجود مشكلات كثيرة بينهم ولكن الزوجة مع كل مشكلة كانت تتحمل من أجل بيتها وأولادها والشيء الذي أدى لتصاعد المشكلات هو عدم إصدار أي تصرف من الزوج تجاه والدته ما جعلها تتمادى حتى وصلت لأخذ الأطفال من الأم وطردها من الشقة ما دفع الزوجة لرفع دعوى تمكين.
وأكدت عزة خلال بيانها سبب دعوى تمكين رفعتها أمام محكمة الأسرة عدم تدخل الزوج لإصلاح الأمور بينهم، مضيقة: “مكنتش حابه إني اتجوز في بيت عيلة بس حبيت خطيبي وقلت مش مشكلة مكنتش عارفة إن كل المشاكل دي هتحصل، بس من أول الجواز وأمه هي اللي ممشيه البيت وجوزي ملوش رأي”.
تابعت: "حصل مشاكل كتير بسبب تدخل أمه وكل ما أجي أكلمه يقولي أمي تعمل اللي هي عايزاه، مش أمه بس اللي بتتدخل دا اخواته كلهم بيتدخلوا في حياتنا في كل حاجة تخصنا، لما لقيت جوزي مبيعملش حاجة وسايب أي حد يتدخل في حياتنا سبت له البيت ومشيت".
حماتي خربت البيت
تركت الزوجة المنزل مرات عديدة عسى أن يتغير الحال ويوقف الزوجة تدخل أهله في كل شئون المنزل ولكن الوضع تمادي دون أي تصرف منه، أضافت عزة: "في كل مرة كنت بتخانق أنا واخواته ويحصل خناقة كبيرة بينا مكنتش بلاقي أي تصرف من جوزي حتى لو ضربوني عمره ما يتكلم، سبت البيت ومشيت وف كل مرة كنت بفكر في الطلاق بس ارجع أقول بلاش عشان خاطر العيال والبيت".
تابعت في دعوى تمكين من شقة الزوجية: "كل ما تحصل مشكلة أقول أمه هتتغير هي واخواته وتبطل تتدخل بس بلاقيها بتزيد ومحدش بيكلمها، في يوم أمه قالت لي انزلي جيبي فطار قولتلها حاضر ونزلت ولما رجعت لقيتها قفلت باب الشقة وخدت العيال وبتقولي مش هتدخلي البيت دا تاني".
أنهت حديثها: "جوزي كان في الشغل كلمته أقوله أمك طردتني من البيت وخدت العيال قالي هي حرة ومعمليش حاجة، كنت فاكرة حمايا هيكلمها بس لقيته برضوا معملش حاجة وسايبها تعمل اللي هي عايزاه وكمان وقف في البلكونة وقعد يشتمني، لما شوفت مفيش حد واقف جمبي روحت عند أمي روحنا رفعنا قضية تمكين عشان أعرف أدخل شقتي وأقعد مع عيالي"، ولا تزال القضية منظورة في المحكمة حتى الآن.
تابع أحدث الأخبار عبر
