منى في دعوى خلع: «بقالي 4 سنين بصرف عليه في السجن وأهله رموه»
محكمة الأسرة تشهد كل يوم مأساة جديدة وهذه المرة وقفت شابة على مشارف الثلاثين شاردة على أعتاب المحكمة لا تدري ما الذي يجب عليها فعله للتخلص من حياتها، التي انقلبت رأسا على عقب منذ أربع سنوات بعد حبس زوجها، فجأة أدركت أنها تواجه الحياة هي وابنها الصغير دون سند، بعد ما كانت تتقاسم كل شيء مع زوجها في عش الزوجية السعيد.
«كنا عايشين زي الفل لحد ما حصل اللي حصل».. بهذه العبارة بدأت الزوجة منى حديثها للقاضي وسرد معاناتها مع زوجها المحبوس منذ أربع سنوات، تابعت: «اتجوزنا وكنا عايشين مبسوطين وكل حاجة تمام وجوزي كان بيشتغل على أوبر والحمد لله كل حاجة كانت مستورة وهو كان كويس أوي معايا في معاملته معايا».
أضافت: «بعد سنتين من الجواز كان سهران في يوم في كافيه وحصلت مشكلة بينه وبين ناس واتخانقوا والخناقة كبرت ووصلت لضرب نار هرب سنتين عشان مايتحبش وفي الأخر جابوه، واتهم في 7 قضايا منها إرهاب وترويع مواطنين وسلاح وأخد حكم بالحبس لمدة 15 سنة ومحبوس دلوقتي بقاله أربع سنين».
سلمت الزوجة أمرها لله وحاولت بقدر الإمكان مساعدة زوجها ومساندته في المحنة بكل الطرق الممكنة ولكن الزوج غير مقدر لمساندتها، أضافت: «من ساعة ما تحبس وأنا نزلت شغل عشان أعرف أصرف على ابني وأعرف أساعد جوزي وهو في السجن ك ان كل مرة وأنا رايحاله بجبله كل حاجة بيطلبها وعملت تظلم عشان تنتهي مدة الحبس ويخرج».
تابعت: «في كل مرة بيطلب حاجات بـ 4 آلاف جنيه ويصمم إني أجبله الحاجة وأنا برضو عندي ابني في مدرسة ومش عارفة أصرف عليه كويس بسبب مصاريف أبوه في السجن ومبسمعش منه ولا حتى كلمة شكرًا على اللي أنا بعمله معاه».
جحود الأهل
طلبت الزوجة من أهل الزوج المساعدة بسبب احتياجاته الكثيرة ولكن الأهل رفضوا المساعدة، حتى رفضوا زيارة ابنهم المسجون منذ بداية حبسه، أضافت الزوجة: «لما لقيت طلباته كتير طلبت من أهله إنهم يساعدوني بالفلوس رفضوا وقالوا احنا مش معانا فلوس مع إنهم بيتفسحوا ليل ونهار ومستواهم المادي كويس جدًا»، تابعت: «أهله مابيفكروش يزوروه من ساعة ما تحبس مش فاهمة إزاي رامين ابنهم كدا من غير ما يسألوا عليه، ولما بقولهم روحوا شوفوا ابنكم بيقولولي المشوار بعيد، قلت أمه قلبها هيحن عليه وتروح مرة برضو مفيش فايدة».
اختتمت الزوجة حديثها: «بقالي أربع سنين أنا اللي بصرف بس وأهله مش بيساعدوا في أي حاجة، مش عارفة أركز مع ابني، حتى جوزي نفسي مش مقدر أي حاجة أنا بعملهاله عشان كدا رفعت قضية خلع عشان أخلص من اللي أنا فيه».. ولاتزال القضية منظورة حتى الآن.
أقرأ أيضًا: منال للقاضي: «بيتفسح في الساحل والسخنة وسايبني من غير ولا جنيه»
تابع أحدث الأخبار عبر
