أخبار محكمة الأسرة اليوم
الشقة من حق الضرة .. عايدة: بنام أنا وبناتي في أوضة وهو مقضيها
رفعت «عايدة» دعوى خلع ونفقة في محكمة الأسرة على زوجها الذي خدعها ولم يصونها أو يعطيها أبسط حقوقها التي تستحقها أي زوجة، وعندما بعد عنها حتى يعمل ويزيد من دخله اكتشفت الزوجة أنه كذب عليها وسبب سفره هو أن يعيش حياته بعيد عن المسؤولية.
قصص محكمة الأسرة.. رضيت بظروفه وعيشت في أوضة
بدأت «عايدة» حديثها وقالت: «أنا متجوزة من 16 سنة، أنا وجوزي مكناش نعرف بعض كويس قبل الجواز، اتجوزنا عن طريق ناس قالوله عليا اتقدملي واتجوزنا، كنت متجوزة في أوضة في بيت أهله عشان مكنش معاه فلوس يجيب شقة برة وقتها وافقت على ظروفه ورضيت».
دعاوي محكمة الأسرة..لنام على نفس السرير
أكملت حديثها قائلة: «خلفت منه 3 بنات وفضلنا عايشين في أوضة بيت أهله وبنام في سرير واحد أنا وهو وال3 بنات، كل ما أطلب منه نعزل أو يجيب سرير حتى للعيال يرفض ويقول معيش وأجيب منين، كنت بسكت هعمل إيه دي ظروفه، لحد ما قال هيسافر يشتغل بره، وقال عشان يحسن دخله وظروفنا تتحسن».
حكايات محكمة الأسرة..متجوز ومش بيسأل فينا
تابعت حديثها قائلة: «مسافر بقاله دلوقتي 4 سنين مبيصرفش علينا ولا بيرجع غير كل كام شهر يصرف فيهم غير كدة مبشوفش منه جنية، حاولت معاه كتير إنه يصرف علينا اللي يكفينا أو حتى يجيب أوضة للعيال، مش راضي ولا راضي يقعد لا ياخدنا معاه، معرفتش أعمل معاه إيه لحد ما زهقت منه وقررت أسيبه لما عرفت أنه متجوز بره واحدة من هنا ومقعدها معاه وراميني أنا وبناته من غير سؤال، خدت بناتي ورحت عند اهلي ومخدش باله حتى إننا مشينا، وجيت المحكمة أرفع عليه قضية خلع ونفقة عشان أخلص منه وأخد منه حق بناته اللي راميهم».