محكمة الأسرة اليوم
فاطمة: أبويا كان عايز يخلص مني رجعتله بعيل
أقدمت «فاطمة» على إقامة دعوى نفقة بمحكمة الأسرة ضد زوجها الذي توقف عن الإنفاق عليها، وقالت الشابة إن والدها أجبرها على الزواج للتخلص من عبء الإنفاق عليها، ومنذ دخولها عش الزوجية شهدت العذاب أشكال وألوان بسبب زوجها الذي اكتشفت أنها لا تعلم حقيقته.
قصص محكمة الأسرة..أبويا غصب عليا أتجوز
قالت «فاطمة» في بداية حديثها: «أنا متجوزة من سنتين، أبويا كان سبب جوازي هو اللي غصب عليا، كان تعبان من زمان ومبقاش معاه يقدر يكفي مصاريفي وعايز يخلص مني، أول ما جوزي اتقدملي وافق على طول ولا يسأل عليه ولا عرفوا كويس وفي الأخر هرجعله مطلقة ومعايا عيل».
دعاوي محكمة الأسرة..قعدت مع جوزي 3 شهور بس
أكملت الزوجة حديثها وقالت: «اتجوزنا بعد الخطوبة بشهر واحد بس مكنتش اعرفه كويس، وقعدت مع جوزي من ساعة ماتجوزته 3 شهور بس متقطعين مش كاملين، كنت كل شوية أغضب وخلفت منه ولد واحد بس، ومن ساعة ما اتجوزته وهو مبيصرفش عليا ولا على البيت وكل ما اطلب منه فلوس يعمل معايا مشكلة ومدفعش حتى فلوس ولاده ابنه».
حكايات محكمة الأسرة.. طلع عنده 3 عيال
تابعت «فاطمة» حديثها قائلة: «مكنش بيصرف عليا ولا أكل ولا شرب وعلى طول مفيش مفيش، وبعد الجواز اكتشفت إنه كان متجوز قبلي وعنده 3 عيال ومبيصرفش عليهم برضو زيي أنا وابني، وأصغر عيل في عياله عنده 9 سنين ومبيسألش فيهم ولا كأنه خلفهم أنا عرفت من الناس، حاولت استحمله عشان مرجعش لأبويا وبالذات إن معايا ولد برضو بس كان صعب أكمل معاه».
قضايا محكمة الأسرة.. باع كل عفش البيت
أنهت «فاطمة» حديثها قائلة: «لحد في مرة سيبت البيت بسبب مشكلة معاه رجعت لقيته بايع كل عفش البيت، وأنا اللي كنت جايبة العفش ساعة الجواز، هو مكنش جايب حاجة خالص، وأبويا عداها عشان يخلص مني، ولما حاولت أوصله عشان يرجع الحاجة ملقيتهوش، وجيت المحكمة عشان ارفع قضايا نفقة وتبديد منقولات عشان حقي اللي اتسرق مني وابني اللي مش لاقي حد يصرف عليه».