أخبار محكمة الأسرة
حكايات محكمة الأسرة.. سناء: مراته القديمة حليت في عينه ورايح يخوني معها
دعوى خلع في محكمة الأسرة كانت صاحبتها «سناء» التي لجأت لأبواب المحكمة حتى تحصل على نهاية لزواجها بسبب خيانة زوجها لها مع طليقته، واكتشفت الزوجة الخيانة عندما صارحتها الزوجة الأولى وتوجهت وقتها لمحكمة الأسرة لتترك زوجها ولا تكمل حياتها معه.
قصص محكمة الأسرة.. اتعرفت على جوزي عن طريق صاحبتي
قالت «سناء» في بداية حديثها: «أنا اتجوزت من 5 سنين اتعرفت على جوزي عن طريق واحدة صاحبتي كان قريبها من بعيد، اتجوزنا بعد قصة حب وخلفت منه ولد واحد بس، وكل حاجة كانت كويسة هو كان بيشتغل وبيصرف وأنا كنت قاعدة في البيت».
دعاوي محكمة الأسرة.. أهله مش موافقين عليا
أكملت «سناء» حديثها وقالت: «المشاكل في الاول كانت مع أهله مكنوش موافقين على جوازنا وهو واخدني غصب عنهم فمكنوش بيحبوني وكاموا عاوزين جوزي يطلقني ويرجع لمراته اللي اتجوزها قبل كدة وكانت قريبتهم وقعد معاها 4 شهور بس وانفصلوا، بس هو مكنش بيسمع كلامهم وكان كويس معايا وقلت لنفسي خلاص اعدي واستحملهم عشان خاطره وعشان خاطر ابني».
حكايات محكمة الأسرة.. بيخوني مع طليقته
تابعت «سناء» حديثها قائلة: «من بعد جوازنا بسنتين لاحظت انه اتغير وبقى بيخرج كتير ويبات بره وكل ما اساله يقولي في الشغل، شكيت فيه انه بيخوني بس مكنش معايا دليل، في يوم مراته الأولى كلمتني وقالتلي إنها بتقابله في فنادق و هما لسه على علاقة ببعض مصدقتهاش قالتلي فتشي في محفظته وهتلاقي وصولات الفنادق اللي بنتقابل فيها عشان تتأكدي».
قضايا محكمة الأسرة.. فتشت وراه عشان أتأكد لو بيخوني
أنهت «سناء» حديثها قائلة: «دورت وراه فعلا مع إني مبعملش كدة في العادي، بس كان لازم اتأكد لو كانت بتقول الحقيقة عشان أتأكد فتشت ولقيتهم فعلا ولما واجهته كدب وقالي دول بتوع واحد صاحبي وكنت متأكدة إنه بيكدب، مسيبتوش وقتها وقلت يمكن يتعدل لكن مفيش فايدة كان بيخرج كتير برضو وطول ما هو برة افضل أكلمه ميردش عليا لما لاقيته مش هيتعدل قررت اسيبه وارفع عليه قضية خلع»