أخبار محكمة الأسرة اليوم
القانون لا يحمي المغفلين.. سيد لـ «الحادثة»: واخدة كل حقوقها وبتقولي إثبت
تواجد «سيد» في محكمة الأسرة بسبب دعوى الطلاق للضرر التي رفعتها عليه زوجته بعد تركها لبيتها بسبب خلاف بسيط بينهما، ومن وقتها حرمته من أن يكون لديه بيت وأسرة مستقلة، وعندما حاول الزوج أن يعيدها لبيته حتى يربوا أبنائهم سويا ولا يخرب بيته ما وجده هو الرفض والغدر من طرفها.
قصص محكمة الأسرة.. خلافاتنا زي أي اتنين
قال «سيد» في بداية حديثه: «أنا متجوز من 14 سنة، خلفت من مراتي ولد وبنت والحياة كانت ماشية وكنا زي أي اتنين متجوزين، كان فيه بينا خلافات بس كانت العادي زي أي بيت، وأنا اللي كنت بشتغل وبصرف ومش مخليها محتاجة حاجة وبتقي الله فيها».
دعاوي محكمة الأسرة..خدت العيال وراحت عند أهلها
أكمل «سيد» حديثه وقال: «لحد من فترة حصل خلاف بيني وبين مراتي بس العادي يعني، تاني يوم رحت الشغل الساعة الصبح لما رجعت البيت بعد المغرب لقيت مراتي وولادي مش في البيت واكتشفت أنها خدت العيال وسافرت وراحت عند أهلها عمرها ما عملت كدة من زمان».
حكايات محكمة الأسرة.. ملقتش حل مع أهلها
تابع «سيد» حديثه قائلا: «بعد ما كلمتها اتفاجئت أنها بتقولي أنا هبهدلك في المحاكم وهخليك تشحت ومش راجعه البيت وعاوزه اتطلق، سيبتها تهدى لقيت الموضوع كبر اكتر من الاول اتصلت بحد من قريبها عشان أكلمه واحكيله الموضوع نحل المشكلة ملقتش اي حل من اهلها ولا خال ولا عم ولا اب ولا ام».
قضايا محكمة الأسرة..رفعت عليا قضايا في المحكمة
أنهى «سيد» حديثه: «حاولت معاها تاني برغم ان مفيش اي غلط عليا ومعملتش حاجة لكل ده، بس كلهم طلعوني أنا الغلطان وصمموا على الطلاق، لما كلمتها قالتلي أنا عايزة أطلق وعايزة القايمة، وهي واخدة كل دهبها معاها وهي ماشية عشان كانت ناوية على الغدر، قالت لي أثبت إني خدت الدهب والقانون لا يحمي المغفلين، وبعدما سابت البيت بشهر لقيت محضر من المحكمة جايبلي جواب على البيت باجتماع في محكمة الأسرة لفض النزاع ورفعت عليا طلاق للضرر ونفقة زوجية ونفقة صغار بنوعيها، وهي مانعة عيالي عني من ساعة ما مشيت».