محكمة الأسرة.. سحر: مصانش البنت بعد ما جبتله الشقة يتجوزوا فيها

تواجدت «سحر» في محكمة الأسرة لتقدم لابنتها الدعم النفسي بعد تجربة الزواج المؤلمة التي مرت بها، استكمالاً للدعم الذي قدمته لها طوال حياتها مثل أي أم حنونة على ابنتها، فعند زواج ابنتها اشترت لها الشقة لتسهل على زوج ابنتها مصاريف الزواج وأملًا منها أن ترى ابنتها سعيدة في حياتها، ولم تعلم وقتها إنها سلمت ابنتها لشخص لن يصونها أو يقدر ما فعلته معها لكنه أوصلها في النهاية لمحكمة الأسرة بحثًا عن حقوقها وحريتها.

قصص محكمة الأسرة.. وافقت على العريس عشان مكسرش قلب بنتي

قالت «سحر» في بداية حديثها: «بنتي اتجوزت بقالها ٥ سنين وخلفت من جوزها بنت واحدة بس، ولما اتجوزت كان عندها ٢١ سنة لما جوزها اتقدم لها عرفت انها تعرفه من الجامعة وكانوا بيحبوا بعض، وافقت على الجواز عشان مكسرش قلب بنتي مع إنه مكنش مناسب».

اقرأ أيضا

محكمة الأسرة.. أسماء: أهلي خايفين من الفضيحة وسايبني اتهان من جوزي وعيلته

محكمة الأسرة.. سيد بدعوى نشوز: بتخوني وبسببها اتقالي اللي عنده معزة يلمها

حكايات محكمة الأسرة.. جبت شقة لبنتي عشان تتجوز فيها

تابعت «سحر» حديثها قائلة: «لما جوز بنتي اتقدم مكنش معاه شقة ولا معاه فلوس يجيب شقة وكنت هرفض الجوازة بسبب كدة بس بنتي صعبت عليا، اديته شقة كانت بتاعتنا وقلت يعيشوا فيها لحد ما ربنا يكرمه ويجيب حاجة أحسن، عملت كده عشان خاطر سعادة بنتي ولما اتجوزوا وخلفوا قلت خلاص أنا اطمنت عليها في بيتها مع جوزها».

دعاوي محكمة الأسرة.. بنتي جوزها بيضربها بسبب ومن غير سبب

أضافت الأم: «بعد ما بنتي اتجوزت وخلفت المشاكل مع جوزها بدأت كان بيتخانق معاها طول الوقت وبيضربها ويبهدلها بسبب ومن غير سبب، وبقى يشرب مخدرات وميصرفش عليها ولا على بنتها أي حاجة، وأنا كنت بساعدهم على قد ما أقدر عشان متطلقش وبيتها يتخرب وتتبهدل هي وبنتها».

قضايا محكمة الأسرة.. جوز بنتي طردها من شقتها

أنهت «سحر» حديثها قائلة: «فضل عايش ٥ سنين في الشقة مبيدفعش جنيه لا كهربا ولا ميه ولا حاجة وحتى مصاريف بيته على القد لو دفع أصلًا، لحد آخر مشكلة حصلت ضرب بنتي وطردها من الشقة وقتها جاتلي ومرضتش أخليها ترجعله تاني لأن خلاص الحياة معاه بقت متنفعش ولما طلبت منه الطلاق رفض، وجيت معاها عشان نرفع قضية خلع ونفقة».