منى تستغيث للقاضي: «بيكهربني وكان عايز يدبحني أنا والعيال»
زوجات كثيرات تلجأن للانفصال بسبب تعاطي المخدرات التي تحول الرجل الصالح لوحش كاسر لا يرى أي شيء أمامه سوى كيفه ومزاجه ما يجعله يفقد عقله تمامًا ويتصرف مثل المجنون، منهن "مني" التي عانت مع زوجها بسبب تعاطيه للمخدرات بطريقة تجعله يريد ذبحها هي وبناتها ما دفعها لرفع دعوى خلع بعد ما أدركت استحالة العيش معه.
«بيكتفني بالحبل وبيكهربني».. بهذه العبارة الصادمة بدأت «منى» تروي قصتها للقاضي، مؤكدة على تحول الزوج المفاجئ منذ مشيه في طريق إدمان المخدرات، أضافت: «من أول الجواز وهو كويس وبيعاملني أحسن معاملة وكل اللي نفسي فيه بيجيبه، حتى بعد ما خلفنا بناتنا الاتنين وهو برضو ونعم الأب معاهم كل الناس كانت بتحسدنا عليه بسبب معاملته الكويسة معايا ومع بناته».
الزوجة تابعت: «حذرت جوزي من جوز اختي عشان بيشرب مخدرات وقولتله ملكش دعوة بيه، وفعلًا جوزي كان محترم وملهوش دعوة بحد بس في أخر سنة لاحظت إنه متغير معايا وكل ما اتخانق معاه يضربني، قعدنا شهر كدا وأنا مش فاهمة السبب بس عرفت إن جوز اختي هو اللي جره للمخدرات».
تفاجئت الزوجة من تحول زوجها المفاجئ بعد إدمانه للمخدرات ولكنها كانت تحاول التأقلم والحفاظ على بيتها، لن تتصور أنه يصل لهذه المرحلة من الهمجية التي تجعله يريد ذبح زوجته وبناته الاثنتين، تابعت: «كنت فاكرة إني هعرف أعالجه وهو لسه في البداية بس معرفتش عشان وديته مصحة وهرب منها، قلت مش مشكلة هحاول اتعامل معاه عشان بناتي بس للأسف معرفتش لأنه كل ما نتخانق يضربني لحد ما بقيت هموت في إيده، مرة كتفني وقعد يضرب فيا وكهربني لولا الجيران لحقوني كنت هموت في إيده».
زوج وأب بلا قلب
تركت الزوجة المنزل عدة مرات وكانت تريد الانفصال في كل مرة ولكن الأهل رفضوا وطلبوا منها التأقلم، أضافت: «كنت عايزة اتطلق بس أهلي رفضوا وقالولي عيشي وخلاص وقالي إنه هيتغير ويبطل شرب وأنا صدقته ورجعت وياريتني ما رجعت، عشان لقيته زاد في الضرب وأخر مرة اتخانق معايا كتفني وقعد يعذب في طول الليل، ولقيته جاب السكينة ومصمم يدبحني أنا والعيال، لولا الجيران لحقتني كنت موت أنا وبناتي».
أنهت الزوجة المكلومة: «أمي جت خدتني لما الجيران كلموها وقالت له طلقها بس هو موافقش، روحت رفعت دعوى خلع بقالي شهر عشان خايفة على عيالي منه»، ولا تزال قضية منظورة في المحكمة حتى الآن.