أخبار محكمة الأسرة اليوم
«عامل رعب للجيران».. غالية: كل ما يتعصب عليا يهددني بالسكينة
تزوجت «غالية» ولم يكن في مخيلتها أنه سينتهي بها المطاف في محكمة الأسرة لترفع دعوى خلع ونفقة على زوجها الذي وثقت فيه وتزوجته ولم تتوقع أن يقسو عليها حتى يضطرها أن تهرب منه وترفع عليه قضايا.
قصص محكمة الأسرة.. أهله ناس مش كويسة
بدأت «غالية» حديثها قائلة: «أنا اتجوزت من 5 سنين وكان جواز صالونات، جوزي لما اتقدملي سألت عليه أنا وأهلي ولما سألنا الناس قالوا إنهم ميعرفوش عنه حاجة لأنه كان مسافر السعودية بيشتغل هناك معظم حياته، بس أهله هما اللي بتوع مشاكل من زمان ومش كويسين هو محترم ومش بتاع مشاكل».
دعاوي محكمة الأسرة.. طلع أسوء من أهله
أكملت «غالية» حديثها وقالت: «سمعت كلام الناس ووثقت فيه لأني مشوفتش منه حاجة وحشة وقلت يمكن هو عكس أهله ومش وحش زيهم، لكن طبعا طلع زي أهله وأسوء منهم، كان طبعه وحش جدًا وعصبي ومش محترم».
حكايات محكمة الأسرة.. بيمسك عليا السكينة كل خناقة
تابعت الزوجة كلامها عن أزمتها مع زوجها وقالت: «كان الضرب عنده طول الوقت وبيستقوى عليا، كنت مخلفة منه ولدين توأم بهدلني وبهدلهم ومكنش فيه حد يقف معايا أهله مشجعينه، كان أسهل حاجة عنده في كل مشكلة يتخانق معايا يتعصب ويضربني ويمسك عليا السكينة يهددني بيها، كل خناقة على كدة وكان معيشني في رعب».
قضايا محكمة الأسرة..عامل رعب للجيران
أنهت «غالية» حديثها قائلة: «لحد أخر مرة ضربني فيها كنت عاملة فيه محضر إنه ضربني وعورني بالسكينة، ولما جيت أرفع عليه قضية طلاق الجيران خافوا أنهم يشهدوا عليه إنه بيضربني لأنهم خافوا منه يعمل فيهم حاجة هو وأهله، ومحدش رضي يشهد معايا كله خاف منه وقالوا مش هنقدر نخرب بيتكم، وجيت المحكمة عشان أرفع عليه قضية خلع ونفقة ».
تابع أحدث الأخبار عبر
