أخبار محكمة الأسرة
محكمة الأسرة وعجائبها.. سما في دعوى نفقة: مش بيصرف ولا عارف يتصرف يأكلنا
رفعت «سما» دعاوى على زوجها في محكمة الأسرة لتحصل على حقوقها المادية هي وأولادها؛ التي حرمهم منها منذ سنين عديدة، وتحملت الزوجة لسنين مثل أي زوجة أصيلة تحملت زوجها وظروفه الصعبة، ولكن عندما وجدت أنه لا يوجد حل ولن ينصلح حال زوجها تركته حتى ترفع دعوى نفقة في محكمة الأسرة ليصرف على أبنائه معها ويتحمل مسؤوليتهم.
قصص محكمة الأسرة..أمي هي اللي جابتلي العريس
قالت «سما» في بداية حديثها: «أنا اتجوزت من سنة 2015 خلفت من جوزي ولد وبنت، أمي هي اللي كانت جايبالي العريس اتقدم لي وكان كويس ومحترم، ظروفه كانت صعبة شوية بس قلت لما اتقدملي يمكن بعد كده ربنا يكرمه وتتعدل ووافقت عليه واتجوزنا».
دعاوي محكمة الأسرة.. على طول مش معاه فلوس
أكملت «سما» حديثها وقالت: «بعد الجواز كان كويس ولحد ما سيبته وهو كان كويس ومش بتاع مشاكل، مشكلته هي الفلوس معهوش ومش عارف يتصرف ولا يعمل أي حاجة عشان بيته ولا أولاده كان على طول مفيش مفيش كل ما اطلب حاجة ليا او الولاد ».
حكايات محكمة الأسرة.. أهلي اللي خلوني اسيبه
تابعت «سما» حديثها قائلة: «فضلت متحملاه كتير وقلت يمكن ظروفه تتعدل لكن هو مش حاسس بنفسه ولا حاسس إننا على طول محتاجين ومش مكفيين البيت ولا مصاريف العيال، وأنا مكنتش بشتغل عشان ولادي صغيرين ومحتاجني معاهم، مكنتش بتكلم ولا اشتكي عشان مشيلش حد همي لكن لما اهلي عرفوا اللي كنت عايشة فيه بسببه قالولي استحملتيه ازاي وخلوني اسيبه».
قضايا محكمة الأسرة.. مبيسألش في العيال
أنهت «سما» حديثها قائلة: «خدت ولادي ورحت عند أهلي ومن ساعة ما مشيت وهو بقى مبيصرفش خالص ولا بيسأل فينا واحنا لسه متجوزين وهو عارف إني رافعة عليه قضايا من السنة اللي فاتت ومش مهتم، رفعت الأول نفقة ومصاريف مدرسية عشان مبيسألش في العيال ولا بيكلمهم رغم إن شغله جنب بيت أهلي اللي احنا فاعدين فيه، كل اللي عمله إنه عمل استئناف على حكم النفقة وبعد كده جيت عشان ارفع عليه قضايا مؤخر ونفقة والعدة حقي الشرعي مش حاجة زيادة».
تابع أحدث الأخبار عبر
