أخبار محكمة الأسرة اليوم
محكمة الأسرة.. سهيلة في ضم حضانة: هددني بخطف بنتي عشان اتجوزت غيره
تواجدت «سهيلة» في محكمة الأسرة بعد الظلم الذي عاشته بسبب زوجها الذي ظلمها طوال فترة زواجها منه؛ واستمر ظلمه حتى بعد طلاقها منه منذ سنين عديدة، بعد زواجها هددها الزوج بأنه سيخطف ابنتها منها لأنها تزوجت من رجل آخر، وحاولت أن تعيش حياتها بشكل طبيعي مرة أخرى، لكنه قرر معاقبتها على زواجها بالرغم من زواجه منذ انفصالهم، واضطرت أن تتوجه لمحكمة الأسرة حتى تمنعه عن قراره في خطف ابنتها من حضنها.
قضايا محكمة الأسرة..أهله معاملتهم وحشة معايا
بدأت «سهيلة» حديثها وقالت: «أنا اتجوزت من 8 سنين وسايبه جوزي من 7 سنين مكملتش معاه سنة واحدة بس وسيبته وأنا حامل في بنتي، مكناش قرايب أنا وهو، وكنا عايشين في بيت عيلة مع أمه وأخواته وكانوا هما سبب المشاكل كلها ووحشين معايا جدا معاملتهم مش كويسة».
دعاوي محكمة الأسرة..اطلقت منه بسبب المشاكل الكتير
أكملت «سهيلة» حديثها وقالت: «لما تعبت من المشاكل الكتيرة معاه ومع أهله اتطلقت منه وكنت حامل في بنتي، أنا اللي مقدرتش ارجعله لما حاول يرجعني بعد ما سيبته والمشاكل بينا كانت كتير جدا ومحدش يتحملها خالص، ومن ساعة طلاقنا وهو مبيسألش على بنته ولا بيصرف عليها».
حكايات محكمة الأسرة..عايز يعاقبني عشان اتجوزت
تابعت «سهيلة» حديثها قائلة: «من 3 شهور أنا اتجوزت واحد قريبي كويس وابن حلال، ومن ساعتها طليقي بيهددني إنه ياخد مني بنتي، بيعمل كده عشان عايز ياخد البنت ويعاقبني عشان اتجوزت وهو أصلا اتجوز وخلف وعاش حياته أول ما طلقني ومبيسألش في بنته اللي عايز ياخدها دي غير كل فين وفين».
قضايا محكمة الأسرة..عايزة بنتي تعيش مع أختي
أنهت «سهيلة» حديثها قائلة: «مكنش قدامي حل غير إني أجي المحكمة عشان أرفع قضية حضانة أخلي بنتي تقعد مع أختي عشان أنا متجوزة ومش هينفع تقعد معايا وأنا مش عايزاه ياخد بنتي مني ومش ضامنة ممكن يعمل معاها إيه أصلًا، وهو عمره ما كان بيسأل فيها، أنا واثقة في أختي تاخد بالها منها أكتر من أبوها».
تابع أحدث الأخبار عبر
