أخبار محكمة الأسرة
«نيته الغدر».. عايدة أمام محكمة الأسرة: حبسته أسبوع وجاي عايزني أكمل
فرت «عايدة» هاربة لأبواب محكمة الأسرة بعد سنوات صعبة عاشتها مع زوجها الذي تزوجته بالغصب من أهلها، وعندما وقفت في وجهه لأول مرة واشتكت بسبب العنف الذي كانت تتعرض له بعدما فاض بها الكيل لم تحد سند لها في الدنيا وكانت على وشك أن تخسر حياتها، وفي النهاية توجهت لمحكمة الأسرة حتى تحصل على حريتها التي لم تستطع الحصول عليها من زوجها.
قصص محكمة الأسرة..أهلي غصبوني على الجواز
قالت «عايدة» في بداية حديثها :«أنا متجوزة من 15 سنة مخلفة من جوزي بنتين وولد، اتجوزنا عن طريق المعارف وأنا دنت مش موفقة عليه عشان مكنتش عايزة اتجوز لكن أهلي غصبوني على الجواز بالعافية عشان كانوا عايزين يجوزوني وخلاص».
دعاوى محكمة الأسرة..استحملته عشان مليش مكان اروحه
أكملت «عايدة» حديثها وقالت: «من بعد الجواز وهو بان على حقيقته كان بني آدم صعب وميطقش، على طول عصبي وفي كل خناقة شتيمة وبهدلة، اتحملت عشان مكنش هينفع ارجع لأهلي لأنهم مكنوش مستحملني وانا لوحدي هيستحملوني بالتلات عيال اللي معايا، اضطريت استحمل اللي كان بيعملوا معايا».
حكايات محكمة الأسرة.. حبسته عشان كان هيموتني
تابعت «عايدة» حديثها قائلة: «في مرة حصل بينا مشكلة ضربني ضرب موت وساعتها اشتكيته وخد أسبوع حبس والكلام ده كان من فترة كبيرة، بعدها مقدرتش أرجعله تاني لأني مش قادرة أكمل معاه وهو ممكن يموتني في يوم من الأيام، والعيال يشوفوه عادي من ساعة اللي حصل بس أنا مش راضية أرجعله».
قضايا محكمة الأسرة..أهلي بيزنوا عليا أرجع له
أنهت «عايدة» حديثها قائلة: «طلبت منه الطلاق ورفض إنه يطلق وقال عايز يرجعني، وفهم العيال إنه عايز يرجعني وأنا عارفاه هو عايزني أرجع عشان ينتقم مني بس عشان حبسته، وبيكلم أهلي عشان يخلوني وفهم العيال انه عايزني ارجع، بس أنا عارفة نيته وهو عايز إيه وخايفة أرجع له ممكن يعمل فيا ايه، وأهلي بيزنوا عليا أرجع مع إنهم هما اللي قالولي أحبسه ساعتها، وجيت ارفع عليه قضية طلاق للضرر عشان اطلق منه واخد حقي».
تابع أحدث الأخبار عبر
