محكمة الأسرة.. نادية: أهله قالوا لي بينا وبينك المحاكم
انتهت كل محاولات نادية في إصلاح زواجها بتوجهها لأبواب محكمة الأسرة، بعد يأسها من الحياة مع زوجها الذي لم يقدرها، ولم يتحمل مسئولية البيت والأسرة التي كرمه الله بها، وكانت نتيجة تحملها هو ترك زوجها لها وأولادها بدون سبب أو مبرر، حتى اضطرت زوجته أن ترفع دعاوى في محكمة الأسرة على أمل أن تصبح حياتها هي وأبنائها مستقرة بعد الحياة الصعبة الي عاشتها.
قصص محكمة الأسرة.. عديت حاجات كتير لجوزي
قالت «نادية» في بداية حديثها: «أنا اتجوزت من 8 سنين، وخلفت من جوزي بنت وولد، كان جواز صالونات وطبيعي زي أي اتنين، لما اتقدم لي كنت فرحانة إني هاتجوز ويبقى لي بيت وولاد وعيلة، وده اللي خلاني عديت حاجات كتير أي حد كان ممكن ما يعديهاش، بس أنا اتحملت، وما كنتش أعرف اللي هيحصل معايا بعد كده».
حكايات محكمة الأسرة.. جوزي كل مدى بيزيد في عمايله
وأضافت «نادية» قائلة: «المشاكل مع جوزي بدأت من فترة كبيرة، كان بني آدم ما يتعاشرش، ما بيصرفش غير على القد وبيشتغل يوم وعشرة لأ، ولو اتكلمت واشتكيت ما الاقيش منه غير الضرب والإهانة والبهدلة، عديت مشاكل كتير، واتحملت حاجات مفيش واحدة تتحملها من جوزها، لكن ما فيش فايدة معاه، كل مدى بيزيد في عمايله وما بيرجعش أبدا».
دعاوي محكمة الأسرة.. جوزي قالي عايزة تطلقي تبريني
وتابعت: «لحد من 4 شهور جوزي سابنا وراح عند أهله، بعد ما عمل مشاكل كتير، ومن ساعتها ما بيصرفش عليا أو على الولاد ولا بيشوفهم ولا حتى بيسأل عليهم لا هو ولا حد من أهله، وقال لي عاوزة تتطلقي اتنازلي عن حقوقك كلها وتبريني وما تاخديش حاجة من حاجتك».
قضايا محكمة الأسرة.. مرضيش يديني حقوقي أنا وولادي
أنهت «نادية» حديثها قائلة: «بالرغم من رفض كل أهلي وافقت إني أبريه وما اخدش حاجة من حقي، مقابل إنه يصرف بس على أولاده، بس هو رفض يديني أي حاجة، ولما كلمت أهله عشان حد يقف جنبي قالوا لي اخلعيه وبينا وبينك محكمة الأسرة، ولما لقيت ما فيش فايدة معاه ومش ها عرف آخد منه حاجة رفعت قضايا خلع ونفقه وقايمة؛ عشان أعرف أخد حقوقي منه».
تابع أحدث الأخبار عبر
