أخبار محكمة الأسرة اليوم
«حقيقتهم بانت بعد الجواز».. حنان لـ محكمة الأسرة: ضربوني وأمه سرقت شعري
تواجدت حنان في محكمة الأسرة وهي لازالت تحمل ألم ووجع بسبب ما شهدته في زواجها، ورفعت دعوى خلع على أمل أن تجد حل لمشكلتها التي كان سببها زوجها وأهله الذي عاشت معهم وكانت نيتها أن تصونهم وترعاهم ونواياهم اتجاهها كانت الغدر القسوة.
قصص محكمة الأسرة.. اتجوزت من قريبي في بيت العيلة
بدأت «حنان» حديثها: «أنا متجوزة من 3 سنين وعيشت مع جوزي سنتين بس وبقالي سنة دلوقتي سايباه، معايا من جوزي ولد واحد بس، أنا وهو كنا قرايب من بعيد بس كنا من نفس البلد يعني يعتبر قرايب برضو من بعض، اتجوزنا وسكنت في بيت العيلة زي بقية الناس في البلد عندنا».
حكايات محكمة الأسرة..كل حاجة بانت بعد الجواز
تابعت «حنان» حديثها قائلة: «ما اكتشفتش حقيقة جوزي غير بعد الجواز لما المعاملة اتغيرت وأهله في بيت العيلة بانوا على حقيقتهم، محدش فيهم كان بيعاملني كويس حتى جوزي، وكان على طول فيه مشاكل وأنا بعدي وأقول كل البيوت فيها مشاكل بس اللي اتعمل معايا كان أصعب من أي حد يستحمله».
دعاوي محكمة الأسرة..أمه سرقت شعري المقصوص
أضافت الزوجة: «لحد أخر مشكلة حصلت بينا كانت لأني كنت قاصة شعري وحطاه في درج التسريحة، وسيبته ورحت عند أهلي ولما رجعت ملقيتهوش ولما سألته عليه قالي أمي اللي خدته وحرقته ورمته ولما قلت وأمك تاخده ليه قال براحتها اعترضت على كلامه ازاي بقى اعترض على اللي قاله، أخد مني ابني ونزله عند أهله وضربني وبعد ما ضربني واتصل بأهله قالهم ضربتها زي م قلتوا».
قضايا محكمة الأسرة..أهله كلهم ضربوني
أنهت «حنان» حديثها قائلة: «أخته وأخوه وأبوه طلعوا شقتي شتموني وبهدلوني وقالولي عايزة تمشي أمشي أحنا مش هنمسكك بس سيبي الولد، قعدت يومين بس في البيت وخدت ابني ورحت عند أهلي، الأهل حاولوا يصالحونا على بعض بس مبقاش ينفع خلاص، رافعة عليه قضية خلع لأنه رافض الطلاق، بس بيصرف على الولد عادي ورفع عليا قضية رؤية وأنا مش منعاه يشوف ابنه بس رفعها عشان رفعت عليه قضية الخلع».
تابع أحدث الأخبار عبر
