أخبار محكمة الأسرة
محكمة الأسرة.. منى : ضرتي اقنعته إن خلفتي بنات وطلقني بسببها
توجهت منى نحو محكمة الأسرة بخطوات ملأها الحزن والألم بسبب زوج لم يقدرها أو يصونها واختار زوجته الأولى وأبنائه منها ولم يختار منى في كل مرة كان يجب عليه أن يختار بينهم، سنين عاشتها الزوجة مع زوجها الذي كانت تأمل أن يصونها في يوم من الأيام ويصونها مثلما يعامل زوجته الأخرى لكن ما وجدته منه هو القسوة عليها بالرغم من أنها صانته وصانت بيته لسنين لكن في النهاية اقنعت الزوجة الأولى الزوج أنها تنجب بنات فقط حتى اضطرت منى أن تتوجه لمحكمة الأسرة بحثا عن حقوقها.
قصص محكمة الأسرة.. انا الزوجة التانية لجوزي
قالت «منى» في بداية حديثها : «أنا اتجوزت من ٩ سنين كنت الزوجة التانية لجوزي، هو عرفني عن طريق القرايب احنا كنا عايشين في نفس البلد، اتقدملي وانا عارفة إنه متجوز ومخلف ووافقت عليه لأنه كويس ومحترم وأهلي كانوا يعرفوه من زمان».
حكايات محكمة الأسرة.. جوزي كان كويس في الأول بس
تابعت «منى» حديثها قائلة: «لما اتجوزت جوزي قالي مراته الأولى فيه بينه وبينها خلافات بس مقاليش هي ايه، بس قال إنه مطلقهاش عشان خاطر العيال ميتبهدلوش وقتها مقولتش حاجة وسكت، عيشت معاه وخلفت منه بنتين والدنيا كانت كويسة بس طلع إن ده كان في الأول بس».
دعاوي محكمة الأسرة.. مبيصرفش عليا ولا على بناتي عشان مراته
أضافت الزوجة: «ضرتي كانت على طول مبتحبنيش وكانت بتقوم جوزي عليا ولما يروح عندها يرجع مش طايقني وكان كل ما يروحلها يرجع يعمل مشكلة معايا بسبب ومن غير سبب وكان بيوصل بيه الأمر إنه يضربني عشان خاطرها وكان مبيصرفش عليا عشان خاطر يصرف عليها وعلى عيالها ويقولي مش هصرف عليكي ولا على بناتك».
قضايا محكمة الأسرة.. اقنعته إن خلفتي بنات وطلقني بسببها
أنهت «منى» حديثها قائلة: «اعدت تزن عليه أنا خلفتي بنات وهو مكنش عايز كدة ساعتها قالي مش عايز يخلف تاني رضيت بكلامه واستعملت وسيلة منع الحمل، وبعدها بفترة اكتشفت اني حامل في شهر، لما جوزي عرف راح مطلقني غيابي، ومسالش فينا ولا بيصرف علينا من ساعة الطلاق وجيت عشان ارفع قضية نفقة عليه ».
تابع أحدث الأخبار عبر
