أخبار محكمة الأسرة
محكمة الأسرة.. سمر: سايبني بالجوع وبشحت أكل علشان أعيش
كانت «سمر» في محكمة الأسرة تحمل الألم والحسرة على تجربة زواج دمرت نفسيتها وحياتها بسبب كثرة المشاكل والخلافات التي حدثت فيها، لم يصون الزوج زوجته طوال حياتهم سويا وتركها تستلف من الأغراب حتى تكفي بيتها ومصاريفه لينام هو ويريح باله وبعد تحملها له لم تجد منه سوى القسوة عليها وعلى ابنهم الذي لم يولد بعد ولكن قررت «سمر» أن تتوجه لمحكمة الأسرة حتى تنهي عذابها الذي عاشته مع زوجها حتى لا يولد ابنها ويواجه مصير مؤلم بسبب والده الغير قادر على تحمل المسؤولية.
قصص محكمة الأسرة.. جوزي كان كويس في فترة الخطوبة
قالت «سمر» في بداية حديثها: «أنا متجوزة من 2018 معايا ولد بس، سايبة جوزي من 2020، جوزي في الخطوبة مكنش كدة كان كويس في الأول لما اتجوزنا كل حاجة بانت وشه الحقيقي ظهر ولما خلفت كل حاجة بانت أكتر وزاد في عمايله اللي محدش يتحملها».
حكايات محكمة الأسرة.. عنده استعداد يفضل نايم طول اليوم
تابعت «سمر» حديثها قائلة: «في مشاكل كتير معاه من زمان كان بني أدم مش كويس وبيشتم ويغلط ومبيصرفش ومبيشتغلش وعنده استعداد ينام 20 ساعة في اليوم ميشتغلش ولا يجيب فلوس وأنا كنت حامل ومش قادرة اشتغل».
دعاوي محكمة الأسرة.. جوزي كان هيموتني أنا وابني
أكملت الزوجة حديثها: «مكناش لاقيين ناكل كنت بستلف من أمي واختي وبستنى اللقمة من الناس، حاولت كتير معاه انه يتعدل لكن مفيش فايدة معاه، أخر مرة كلمته عشان مفيش مصاريف وبقوله مينفعش يفضل قاعد في البيت ومبيشتغلش لسه بتكلم معاه وافهمه أنا واللي في بطني هناكل منين ونشرب منين وهو مبيصرفش مسكني ضربني وكسر باب الشقة عليا وكسر البيت كله كنت هسقط وهموت في ايده أنا وابني الحامل فيه».
قضايا محكمة الأسرة.. سيبت جوزي خفت على ابني منه
أنهت «سمر» حديثها قائلة: «بعد اللي عمله معايا رحت عملت محضر في القسم فيه ومرجعتلوش تاني خفت ممكن يعمل ايه فيا أنا وابني، واتطلقت بقضية خلع لأنه مكنش عايز يطلقني ودي جاية أرفع قضية نفقة عشان أقدر أكفي مصاريف ابني اللي مبيسألش عليه أبوه».
