"عيني الشمال باظت".. ننشر أقوال المتهم بقتل زميله في الزيتون بسبب 300 جنيه
كشفت التحقيقات مع المتهم بقتل زميله في الزيتون في القضية رقم 5434 لسنة 2023 المنظورة أمام محكمة جنايات القاهرة أن مشاجرة نشبت بينهما بسبب 300 جنيه، وأدلى الجاني بأقواله أمام جهات التحقيق، وننشر نص التحقيقات.
أقوال المتهم بالتخلص من زميله في الزيتون
وقال المتهم بالتخلص من صديقه في الزيتون في التحقيقات: أنا كنت واقف مع أصحابي عند البيت ولقيت المجني عليه جه وقال لي هات الـ 300 جنيه اللي عليك، وقلت له أنت ما لكش عندي حاجة. أنا كنت شاري منك بطارية ودفعت فلوسها، وكان باقي 130 جنيه وانت قلت لي أنا مسامحك فيهم، ولكن ما لكش عندي جنيه ولا حاجة، قال لي خلاص براحتك، بس أنا هعدي عليك بالليل وهاخد الفلوس بمعرفتي، ومشي.
وأضاف المتهم خلال أقواله: أنا كملت اليوم عادي، وأنا في البيت على بعد المغرب كده لقيت المجني عليه جالي تحت البيت ونده عليا، خرجت له من البلكونه قال لي يلا انزل عاوزك. قلت له شوية كدا. قال لي طيب أنا مستنيك الشوية دول تحت البيت.
اقرأ أيضا
تفاصيل مقتل شاب على يد صديقه بالزيتون
وتابع: لما لقيته فضل قاعد تحت البيت نزلت له وقلت له تعالى. ومشينا بعيد عن البيت وطلعنا على الناصية، فأنا قلت له إنت بتتكلم على إيه، إنت ما لكش عندي حاجة، قال لي إزاي؟! وراح ضربني بالقلم على عيني، وكان ماسك حاجة في إيده أنا مش شايفها واتعورت في حاجبي، ومسكنا في بعض وشدني من رجلي ووقعني على الأرض، وشدني في نص الشارع من رجلي، وفضل يضرب فيا في وشي، رحت حشته من عليا وقمت وقفت ولقيته فتح مطوة في إيده وضربني في رقبتي، ولقيته ضربني تاني بالمطوة في عيني الشمال، حسيت بنافورة دم على وشي وما شفتش حاجة خالص، رحت ماسح الدم من على وشي، وحاولت آخد المطوة منه وأخذتها، وبدأت أضرب فيه وانا مش شايف من الدم اللي على وشي.
عيني الشمال باظت وصديقي مات
وتابع: أول لما فتحت عيوني لقيت المجني عليه بيجري ورا عربية، رحت جاري وراه، ولقيت حديدة على الأرض رحت خابطة بيها على إيده، رجعت الناس شدتني وبيقولوا لي عيونك راحت، اجري على المستشفى، وخدوني ورحت مستشفى الدمرداش، وعرفت إن عيني الشمال باظت خالص، وعرفت إن هو مات، وجه قسم الزيتون، وأخدوني على القسم وجيت على هنا.
تابع أحدث الأخبار عبر
