أخبار محكمة الأسرة
محكمة الأسرة.. أمينة: اتجوزت غصب وعيشت 10 سنين مرار
تواجدت «أمينة» في محكمة الأسرة بسبب زوجه الذي كرهت الحياة معه وأصبح من المستحيل بالنسبة لها أن تكمل حياتها معه، في مقتبل عمرها توفى خطيب «أمينة» ، وكانت صدمة كبيرة عليها وتحطم قلبها لكن غصبها أهلها على الزواج من رجل لم تحبه يوما ولم يكن هناك بينهم توافق، ووافقت «أمينة» على أمل أن تجد الحب في حياتها من جديد ولكنها كانت مخطئة وعاشت سنين من الألم والقهر مع زوجها وكانت محكمة الأسرة هي ملجأها الأخير.
قضايا محكمة الأسرة.. خطيبي مات قبل فرحنا بمدة قليلة
قالت «أمينة» في بداية حديثها: «أنا اتجوزت من 10 سنين، وكان عندي 25 سنة وقتها، وخلفت من جوزي ولدين، أنا كنت مخطوبة لواحد قبل جوزي وكنت بحبه جدا وكنا هنتجوز ومات قبل فرحنا بمدة قليلة، جالي اكتئاب بعدها والدنيا اسودت في وشي».
دعاوي محكمة الأسرة.. اتجوزت جوازة كانت غصب
أكملت الزوجة حديثها: «كنت مقررة إني مش هتجوز، أهلي قالولي مينفعش كدة ولازم افوق لنفسي وغضبوا عليا اتجوز واحد شغال في شركة تبع أهل ابويا، كانت جوازة غصب، وافقت عليه واتجوزته وعيشت معاه 10 سنين زي اللي بياكل لقمة غصب وكان منغص عليا عيشتي».
قضايا محكمة الأسرة.. عايشة في خلافات مع جوزي
تابعت «أمينة»: «كان مفيش بينا توافق خالص وكان في بينا مشاكل كتير وكنت بتحمل واصبر عشان أهلي مكنوش راضيين يخلوني اسيبه وقالولي عشان ولادك ميتبهدلوش، تعبت منه جدا كنا على طول في خناق ومشاكل ومكنتش قادرة أكمل معاه، كان بخيل وعلى طول بيغلط وبيقول عليا كلام مش كويس».
حكايات محكمة الأسرة.. رافعة قضية خلع بقالي كتير
أنهت «أمينة» حديثها وقالت: «لحد ما حصل مشكلة لابني كانت السبب في إن عينه تروح ملقتهوش جنبي ورفض أنه يقف معايا أو يدفع أي فلوس، واخرتها طلع بيخوني عرفت من التليفون من الرسايل اللي شفتها عليه، كل الحجات دي خلتني اسيبه ومقدرش أرجعله تاني أنا خلاص مش عايزة أعيش معاه تاني، سايباه من كام شهر رافعة الخلع من شهر 8 المحامي عايز فلوس وسايب القضية مش راضي يكمل في الإجراءات الا لما اديله باقي الفلوس وانا معيش يكفي».
تابع أحدث الأخبار عبر
