أخر خدمته سحلة بالشارع.. نهال : كنت هموت نفسي عشانه وفي الأخر شك في شرفي
وقعت «نهال» في الحب في سن صغير ولم تكن تعلم أبدا ان نهاية قصة حبها ستكون محكمة الأسرة بسبب زوجها مدمن المخدرات الذي دمر حياتها.
حب عمري سحلنى بالشارع
منذ ان فتحت «نهال» عينيها على الدنيا وجدت ابن عمها هو الرجل الوحيد في حياتها ووقعت في حبه وهي فتاه صغيرة في سن الـ 13 وبعد ان تقدم لها رفض الأهل لصغر سنهم والمشاكل بين العائلتين، واجهت «نهال» عائلتها ووقفت في وجههم من أجل حبها وتزوجت من حب عمرها على أمل أن تكمل معه حياتها، ولكن سيطرت المخدرات على عقل زوجها وجعلته غير واعي للأذى الذي عرض له زوجته، فجعلها بعد حبها له تتوجه لرفع دعوى خلع خوفا منها على حياتها معه.
زواج عن حب
قالت نهال: «أنا اتجوزت ابن عمي ومن وأنا عندي 17 سنة، حبيته من وأنا عندي 13 سنة، لما اتقدملي أهلي كانوا رافضين ومحدش موافق عليه بسبب أن في مشاكل بين العيلتين، رميت نفسي من الشباك عشانه وشربت سم عشان أهلي رفضوا الجواز كنت مستعدة اموت بس معيش من غيره، لحد ما وافقوا أننا نتجوز.»
جوزي بقى مدمن مخدرات
تابعت نهال: «اتجوزت وجبت منه 4 أطفال، عيشنا مع بعض سنين ومكنش في مشاكل ولو في مشاكل بنحلها سوى من غير ما حد يتدخل بينا، هو كان سواق ميكروباص، الناس اللي حواليه كانوا الأول بيدوله سيجارة وبعد كدة بقى يشرب حشيش بعد كدة بقى مخدرات تانية كان بيشرب حجات عادية وبسيطة في الأول لحد ما وصل للحقن وبقى مدمن مخدرات»
بيشك في شرفي
أكملت نهال: «عالجته مرتين عشان يرجع كويس زي الأول ويرجع الراجل اللي حبيته لكنه كان بيرجع كل مرة، اتغير خالص بقى يشك فيا بيشتمني بأوحش الألفاظ، على طول بيتهمني في شرفي دايما وبيتهمني أني بخونه، كان بيضربني يسحلني في الشارع.»
دعوى خلع
أنهت نهال كلامها: «كنت مضطرة اسيبه بسبب عمايله، لأنه بقى يهددني بالقتل عشان ارجعله بس انا لو فضلت معاه كنت هموت برضو، لحد مقدرتش اتحمله ورفعت قضية خلع عشان هو رفض الطلاق الودي»
تابع أحدث الأخبار عبر
