أغرب دعوى نفقة| إسراء: "جايه أرازي فيه عشان يزودلي المصروف"
مشادات طفيفة بين "إسراء" وزوجها على المصروفات اليومية واحتياجات المنزل والأولاد مثل أي عش زوجية لا يخلى من المشكلات لكن عندما تكررت المشادات والخلافات على نفس السبب، قررت الزوجة تغيير روتين حياتها ورفع دعوى نفقة على زوجها.
"مفيش مشاكل بينا بس هو مش راضي يزود لي المصروف وأنا زهقت عشان كل يوم أطلب منه يزود لي مصروف البيت" هذه الكلمات الأولى التي قررت “إسراء” أن تبدأ بها رواياتها مؤكدة على أن زوجها طيب يرعى ربنا فيها هي والأولاد، ولكنها سئمت من الخلافات المتكررة على مصروف المنزل.
تابعت: "احنا متجوزين عن حب وهو راجل محترم وكويس معايا وبيحبني، وكل حاجة بينا تمام من أول الجواز بس مصروف البيت اللي بيسيبه كل يوم مبقاش يكفي، وكل ما أقوله يسيب فلوس زيادة وهو نازل يطنشني ولا كأني بقول حاجة".
جاية أرازي فيه
ظلت المشكلات بينهما تتصاعد على نفس السبب ولم تجد الزوجة حل لهذه المشكلة، وبعد تفكير طويل في مشكلات وجدت أن الحل الوحيد لمشكلاتها هي رفع دعوى نفقة لعله يتعظ ويزود لها المصروف.
أضافت إسراء: "كل يوم بنتخانق على حكاية المصروف دي وهو برضوا مش راضي يزودلي المصرف، زهقت من الخناقات ومكنتش عارفة أعمله إيه، لحد ما لقيت إني أجاي أرازي فيه وأرفع قضية نفقة يمكن يزودلي المصروف".
استكملت: "جيت رفعت عليه قضية النفقة بقالي 3 شهور، لما كان بيبقى عندي مشوار للمحكمة مكنتش بقوله واستنى لما ينزل وأروح أنا المحكمة من وراه، في الأول مكنش يعرف إني رفعت عليه قضية ولما عرف خد الموضوع بهزار".
عايزني أتنازل عن القضية
أخذ الزوج موضوع رفعها للقضية هزار ولم يحدث بينهما أي مشكلات ولكنه أراد منها ان تتنازل عن القضية وعندما علمت والدتها طلبت منها التنازل أيضا ولكن أصرت على موقفها واستمرت في إجراءات القضية.
اختتمت إسراء قصتها: "قالي روحي اتنازل عن القضية بس أنا مرضتش، وأمي كمان لما عرفت أني رافعة عليه قضية قالت لي إيه الهبل اللي انتي عاملاه دا بس أنا قلت مش هتنازل هكمل القضية عشان يزود لي المصروف".
تابع أحدث الأخبار عبر
