«عايز يتستت في البيت».. أماني بدعوى نفقة: "حاله باظ من ساعة وفاة والده"
مثل العديد من السيدات على أعتاب محكمة الأسرة لجأت «أماني» للمحاكم بعد محاولات كثيرة في إصلاح زوجها وإصلاح علاقتها معه حتى لا تخرب بيتها وتربي أولادها في عائلة طبيعية لكن الظروف دفعتها لأبواب المحاكم وحبالها الطويلة.
فتاة في سن الـ 16 تقدم لخطبتها شاب وكان مناسب ووافقت على الزواج منه وكانت حياتهم طبيعية لكن ضغط الحياة وعدم قدرة تحمل زوجها للمسئولية دفعها لتركه ورفع قضية نفقة في محكمة الأسرة حتى تستطيع إنقاذ نفسها هي وأولادها.
قالت «أماني»: «أنا عندي 25 سنة اتجوزت من وأنا 16 سنة كنت لسه عيله معرفش حاجة، بعد الجواز جبت 3 عيال والحياة كانت ماشية لحد ما المشاكل مع جوزي بدأت من 4 سنين من ساعة وفاة حمايا».
أماني: جوزي حاله باظ من ساعة وفاة والده من 4 سنين
تحدثت أماني عن سبب تركها لزوجها وقالت: «سايباه بسبب إنه مبيشتغلش ولا بيصرف على عياله، والده اتوفى من 4 سنين ومن ساعتها وهو حاله باظ، أبوه كان مربيه ومخليه يشتغل غصب عنه ويقوله عيب عليك لازم تشتغل عشان تصرف على عيالك لكن من بعد ما مات وهو بطل يشتغل خالص، المشاكل كترت بسبب إنه مبيشتغلش والمصاريف زادت وصل إنه شوية يشتغل وشوية ميشتغلش، الصراحة إنه طول ما بيشتغل بيصرف علينا لكن في الأغلب لا بيشتغل ولا بيصرف».
تابعت: «بقالنا على الحال ده 4 سنين ولما بتعب منه بغضب اروح عند والدتي لكن المشاكل مبتتحلش وهو مبيشتغلش، كل مرة برجع لما أهله يتوسطوا بينا ويقولوا هيشتغل وهيتعدل لكن مكنش في جديد، لحد أخر مرة لما سيبت البيت محدش اتوسط بينا لانهم عارفين انه مش هيشتغل ولا هيصرف على عياله».
أماني: جوزي مش عايز يشتغل وعايز يتستت في البيت
لم ترغب «أماني» أن ترفع دعوى نفقة على زوجها والد أطفالها لكنه لم يترك لها أي حل فلم يرد تحمل أي مسؤولية وألقى بكل المسئولية على عاتقها ولكنها فعلت ما بوسعها حتى تصلح زوجها لكن كل محاولتها فشلت.
أضافت «أماني»: مقدرش اشتغل ولادي صغيرين ومحتاجين أمهم معاهم، مصاريف العيال كتير وهو مش مكفي أي حاجة خالص وكلنا تعبنا منه أنا وأهلي وأهله جبناله شغل كتير لكن مفيش حاجة عاجباه ومش عايز يشتغل من غير سبب مقنع قاعد في البيت بس، قلت لما ارفع عليه دعوى نفقة يمكن يحس بالمشكلة ويعمل أي حاجة لكنه معملش حاجة لما عرف إني رفعت دعوى نفقة هو أصلا معهوش حاجة يدفع لكن هعمل ايه.
تابع أحدث الأخبار عبر
