«هدير» من أمام محكمة الأسرة: جوزي خطف عيالي عشان يحرق قلبي
على أبواب محكمة الأسرة تقف أم جفت دموعها من حزنها على غياب أطفالها عنها فبعد تحملها كل هذه السنين لزوج غير متحمل المسئولية وكذاب غدر بها وأخذ منها طفليها وتركها تلجأ لـمحكمة الأسرة في محاولة منها لتراهم مرة أخرى.
تقدمت ابنة عم والده «هدير» لخطبتها لابنها وهي في سن العشرين وأوهمتها هي وعائلتها أن ابنها شخص صالح ومتقي لربه، وثق فيها عائلة «هدير» وافقوا على الزواج ولكن ما تفاجئو أن كل شيء يعرفونه عن هذا الشخص ما هو إلا كذبة.
«هدير»:استحملته 10 سنين وغدر بيا
قالت «هدير»: اتجوزته 10 سنين وكانت مشكلتي معاه انه قاعد من الشغل ومبيكملش في شغلانة ومبيصرفش علي أنا والعيال، من أول ما اتجوزت وكان مبيكملش في شغلانة ولما اكلمه يقولي هو ده اللي أقدر عليه استحملته طول السنين دي ومكنتش بشتكي لحد عشان أعيش وأربي عيالي وفي الأخر غفلني خد العيال قال عشان يشوف ستهم وعمل مشكلة وقالي خدي عيالك من القسم.
عانت «هدير» مع زوجها لسنين حتى تعيش وتربي أولادها فتحملت قله الأموال وتحملت تأخر الايجار ومطالبة الناس الدائمة لها بالأموال وتحملت إهانة وضرب زوجها لها وتكسيره لبيتهم لكن مقابل كل ما تحملته لم يقدرها زوجها أو يحافظ عليها بل هانها وكسرها وتركها حزينة على أولادها.
«أم هدير»:قلبي كان بيوجعني على حال بنتي و أولادها
كانت «أم هدير» معها في المحكمة لتدعم بنتها وتقف معها في أزمتها وقالت عن معاناة ابنتها مع زوجها: بيكدب من يوم ما اتجوزوا عن شغله وعن كل حاجة عنه، بنتي عيبها مكنتش بتشتكي أبدا وكانت بتستحمل لكن كان بيبان عليها هي وولادها إنه مبهدلهم ومبيصرفش عليهم، ولادها كانو بيلبسو لبس شحاتة من قرايبهم وأنا كنت بساعدهم على قد ما أقدر، وكمان كان أهم حاجة عنده السجاير بياخد لو مع بنتي فلوس يصرفها على السجاير، وللأسف أمه اللي هي بنت عمي كانت دايما بتلوم على بنتي وبتقولها ماتستحملي فوق كل اللي بنتي كانت شايلاه.
تابعت «أم هدير» وهي تبكي على حرقة قلب ابنتها: لما تشوفيه كنتي تتخدعي فيه، وزادت مشاكله واستقوى على بنتي أكتر بعد موت أبوها شاف ان مبقالهاش حد يقف معاها وأبوها كان عايز يطلقها منه من زمان ولكن كان ولادها صغيرين ومش عايزنهم يتبهدلو، وصل بنتي إنها تمسح شقة الناس عشان يكون معاها فلوس تأكل عيالها وفي الأخر خدهم منها وحرق قلبها عليهم وبيقول انه واخدهم عشان سايبها تتأدب إنها تشوف الدراسة بتبدا وعيالها ميدخلوش مدارس وهي معملتش حاجة، ورافعة قضيتين خلع و ضم العيال عشان تقدر تشوف ولادها تاني .
تابع أحدث الأخبار عبر
