نهى في دعوى طلاق: اتجوزته "محلتوش اللضا" أول ما اغتنى رماني
لجأت نهى لمحكمة الأسرة بالجيزة لترفع دعوى طلاق بعدما اكتشفت حقيقة وغدر زوجها الذي استحملته طوال فترة الخطوبة، ساندته في كل المواقف الصعبة، لكنه حينما عثر علي عمل جديد بمرتب أفضل تركها.
"ساعدته في كل حاجة" بهذه الكلمات بدأت نهى حديثها والحسرة تملأ وجهها بسبب غدر زوجها لها بعد ما ساندته في كل تجهيزات الفرح وشقة الزوجية، مضيفة: "اتخطبت له ومكنش حيلته حاجة ولا معاه فلوس يجهز حتى الشقة بس أنا عشان كنت بحبه صممت اتخطبت له وأهالي مكنوش موافقين لإنه معندوش شقة ولا أي حاجة".
تابعت: "اتخطبنا ونزلت اشتغل عشان اساعده في تجهيز الشقة من غير ما أهلي يعرفوا وقعدنا 3 سنين في الخطوبة عشان هو كان على قده وكان بيجمع فلوس بالعافية".
ظنت الزوجة أنه سيكون السند
تزوجت نهى من حبها التي حاربت أهلها من أجله وكانت تظن أنه يكون السند لها ولكنها لا تعلم أنه سيتحول عندما تصبح الأموال بين يديه، أضافت: "كنت بحلم باليوم اللي نتجوز فيه والحمدلله اتجوزنا وكنت فاكره الحياة هتبقى بمبي بس مطلعش كدا للأسف هو عاملن كويس أول كام شهر وبعد كدا اتغير معايا وبقا بيعاملي معاملة زي الزفت"، تابعت: "مكنتش فاهمة هو ليه اتغير معايا واية سبب المعاملة دي، بس عرفت من اخواته إنه جاله شغل جديد وبفلوس كويسة ومكنش قايلي".
غدر الزوج بعد ما أصبح يمتلك أموال
انزعجت الزوجة وانصدمت من فعل الزوج بأنه لم يخبرها بعمله الجديد خوفًا من أن تطمع به ما جعلها تفكر في الانفصال، أكملت نهى: "أخته قالت لي إنه مقاليش على شغله الجديد عشان خايف أطمع في الفلوس مع إني وقفت جمبه في كل حاجة في الجواز لحد ما ربنا كرمنا واتجوزنا"
تابعت: "كنت فاكره أخته بتقول أي كلام ومعرفتهوش إني عارفة، بس لما بقيت اطلب منه أي فلوس بقا يقولي مش معايا أجبلك منين ومبقاش بيسيب لي فلوس خالص ولما المشاكل زادت قالي أنا مش عايزك ابريني عشان أطلقك"
أنهت الزوجة حديثها: "لما لقيت الموضوع زاد روحت عند أهلي وطلبت منه الطلاق ورفض روحت رفعت دعوى طلاق عشان مبقتش عايزة أعيش معاه"
تابع أحدث الأخبار عبر
