اغتيال الملك فيصل كان تار ولا مؤامرة؟.. تخلص منه ابن شقيقه بـ3 رصاصات

اغتيال الملك فيصل موضوع يمكن عدى عليه سنين، ومش بس عدى لا ده كمان اللي قتله اتحاكم بس السؤال اللي لسه كتير بيسأله هو اغتيال الملك فيصل كان تار ابن اخوه ولا كانت مؤامرة خارجية ضده.

حكم السعودية 11 سنة

الملك فيصل حكم السعودية حوالي 11 سنة كان شخصية قيادية قوية في المحافل العالمية والعربية، واكتسب شهرة كبيرة جدا في فترة متعتبرش طويلة، وكان معروف رأيه في موضوع القضية الفلسطينية وغيرته علي الأراضي العربية المحتلة، وموقفه مع مصر في حرب أكتوبر لما قلل كميات البترول اللي بيصدرها عشان يخلي دول الغرب في الصف العربي بس تم اغتياله على ايد بن اخوه وده اللي هنعرفه في حلقة النهاردة.

التاريخ السياسي للملك فيصل

الملك فيصل بن عبدالعزيز ال سعود، اتولد في 15 نوفمبر سنة 1906 قبل ما يتولى حكم المملكة عدى بمراحل كتير منها انه اتعين وزيرا للخارجية ورئيس لمجلس الوكلاء ورئيس مجلس الوزراء لحد ما جه قرار من علماء وشعب السعودية بعد وفاة والده عبدالعزيز ال سعود الملك بأن يتولي حكم المملكة.
في يوم 25 مارس سنة 1975 الملك فيصل كان بيستقبل ضيوفه في مقر رئاسة الوزراء في الرياض وكان موجود وزير النفط الكويتي الكاظمي ومعاه وزير البترول السعودي أحمد زكي يماني في أوضة الانتظار.

في الوقت ده وصل الامير فيصل بن مساعد وده يبقي ابن اخو الملك فيصل اللي مكنش جي لاجتماع أو حاجة هو كان جي بحجة انه عايز يدخل يسلم علي عمه الملك فيصل.
دخل الامير فيصل مع الوزارء وكان واقف في استقبالهم الملك فيصل وفي الوقت ده طلع الأمير مسدس من هدومه  وضرب 3 طلقات علي الملك فيصل
اتنقل بسرعة للمستشفى المركزي في الرياض بس الـ3 طلقات كانوا قادرين أنهم يقتلوه ويفارق الحياة.

عقاب المتهم وسر ارتكاب الجريمة

اتقبض على ابن اخوه فيصل وراح السجن بعد ما اتحقق معاه وبعد 82 يوم اتنفذ عليه حكم القتل بالسيف في الرياض سنة 1975.
طب هو ليه عمل كدة بالرغم من صلة الدم اللي ما بينهم ..طب قتل الملك فيصل ده كان تار ولا مؤامرة؟ ركز معايا في اللي جي وهقولك الحكاية من أولها،
الأمير فيصل ابن اخو الملك كان له اخ معروف بالتشدد الديني اسمه "خالد" واتقال برضه أنه كان عنده مشاكل نفسية المهم كان شايف ان جهاز التليفزيون بدعة وضرره اكتر من نفعه وان الجهاز ده هيكون سبب عقاب ربنا لبلده.

محدش استجاب ليه وملقاش رد من حد ..فقرر أنه يقتحم محطة التليفزيون في الرياض ويدمرها

فيه رأيين في مسألة اتقتل امتى.. رأي بيقول انه اتقتل وهو بيقتحم محطة التليفزيون على ايديين مجموعة مسلحة لما حاول يقتحم المحطة 
ورأي التاني فـ بيقول ان الملك فهد بن عبدالعزيز أمر باعتقاله عشان يتفاهم معاه وينصحه بأن اللي عملوا ده غلط، وبعت فرقة من القوات الخاصة لحد بيته وحاصرته في نص الليل واتقال ان قائد الفرقة دي هو اللي ضرب عليه النار.
لكن الامير عبدالله بن مساعد اخو خالد قال ان المفروض ان فيه حد من اعمامه يجي لحد بيت خالد ويصلي معاه الفجر بعدها ياخده عشان يتحقق معاه في اللي عملوا في محطة التليفزيون.

ووصلت الشرطة وعرض عليهم الأمير خالد بن مساعد انه يجي معاهم بعربيته بس الشرطة رفضت واصروا انه يجي معاهم وحاولوا يقبضوا عليه بالقوة فرجع خالد جوة البيت، وهنا برده اختلفت الاراء بين مين اللي بدأ بضرب النار الأول بس في النهاية الشرطة ضربت رصاصة جت في دماغ خالد ومات بعدها.

طب دي رواية اغتيال الملك فيصل لو السبب كان تار..  طب لو مؤامرة ؟

لو فاكر قولتلك في أول الحلقة ان الملك فيصل كان شخص غيور على عروبته ودينه وفي حرب أكتوبر كان ليه مواقف كتير ضد أمريكا والغرب منها لما قلل انتاج البترول بنسبة 10% ولما استمرت أمريكا في دعم اسرائيل اصدر قرار بوقف تصدير البترول لامريكا

وصلت قوته لدرجة أن بعض الصحف الكبيرة في الدول الأجنبية كتبت أن القوة اللي عند الملك فيصل قادرة انها تخليه بحركة واحدة من ايده يشل الصناعة الأوروبية والأمريكية ويقدر يحطم التوازن النقدي.

كل الاحداث دي اثارت الشكوك حوالين الاغتيال وخلت فيه وجهات نظر كتير بتقول ان اغتيال الملك فيصل مكنش تار اخ لاخوه وكان تخطيط موجود من الدول الخارجية.

بس السؤال هنا ليه الأمير فيصل يقتل عمه بعد 10 سنين وليه يقتل الملك فيصل اصلا وميقتلش اللي قتل أخوه كل دي اسئلة موجودة.

وهنا بقت الصورة واضحة قدامك وتقدر تقولي هل هو تار ابن اخوه خالد، ولا كانت مؤامرة خارجية ضد الملك فيصل ولا فعلا الأمير خالد كان عنده مشاكل نفسية والسبب ملوش علاقة لا بتار ولا بمؤامرة.