100 سنة ومحدش فك اللغز.. أغرب قضية قتل أمريكية في الغرفة 1046

في حلقة جديدة من برنامج ضد مجهول، والذي يعرض على موقع الحادثة، استعرض المذيع محمود عبدالله واحدة من أشهر القضايا المقيدة ضد مجهول في أمريكا، واللي حصلت من قرن تقريبًا.

بداية القصة مع شاب أمريكي حجز غرفة في فندق بريزيدينت وقال إن اسمه رونالد أوين من سكان لوس أنجلوس، من أول يوم عمال الفندق بدأو يلاحظوا حاجات غريبة عليه، زي إنه بيغطي الشبابيك وأي مصدر للنور في الأوضة بالملايات، وطول الوقت خايف ومتوتر، ومرة عاملة النضافة لقت إن فيه حد قافل عليه باب الأوضه من برة، ومرة تانية وهي لسه داخله تنضف الأوضه حد زعقلها وطردها.
وفي اليوم التالت عمال الفندق لقوه مرمي على الأرض وسايح في دمه، وباين إنه اتعرض لتعذيب، لكنه قال إنه اتزحلق في البانيو ولما نقلوه المستشفى مات.
الشرطة حققت في الواقعة ولقت إن له اسم مختلف، ولما مات حد بعت للشرطة فلوس الجنازة وورد، والشرطة حاولت تعرف مين ده ولكن معرفتش، ولحد دلوقتي القضية ضد مجهول.