أخبار محكمة الأسرة اليوم
مطمرش فيه .. غالية: وقفت جنبه في حبسه ولما خرج رجع لضرتي
رفعت «غالية» دعوى نفقة على زوجها والد طفلها، الذي منذ أن وافقت أن تكون زوجته الثانية كثرت المشاكل في حياتها، حتى كانت أخر مشكلة دخول الزوج السجن بسبب المخدرات، وبعد وقوفها بجانبه طوال فترة زواجهم وجدت نفسها في محكمة الأسرة بسببه.
قصص محكمة الأسرة.. وافقت ابقى الزوجة التانية
بدأت «غالية» حديثها وقالت: «أنا متجوزة بقالي 10 سنين، وكنت الزوجة التانية لجوزي، وكنت عارفة إنه متجوز لما اتقدملي، وعرفت ساعتها إنه مش مرتاح مع مراته عشان كدة هيتجوز عليها ومرضيش يطلقها عشان خاطر الولاد وأنا وافقت اتجوزه ورضيت بظروفه وخلفت منه ولد واحد».
دعاوي محكمة الأسرة..مراته بتعمل أعمال
أكملت حديثها قائلة: «من ساعة ما اتجوزته والمشاكل مع مراته الأولى كتير كانت ست بتاعت مشاكل ومش بتحبني أنا وابني كانت بتعملي أعمال عشان بيتي يتخرب، بس كنت بعدي عشان خاطر ابني، وفي مره اتطلقت منه بسببها ورجعني بعد كام شهر كان ابني عنده ٣ سنين».
حكايات محكمة الأسرة..لفيت وراه في فترة حبسه
تابعت حديثها قائلة: «الدنيا كانت ماشية لحد ما جوزي اتحبس في قضية مخدرات هو كان بيشرب بس مش كتير، اتحبس وفضلت وراه ٧ سنين كنت بصرف عليه من فلوسي عشان المحامين وعشان أساعده وأقف جنبه في فترة حبسه».
قضايا محكمة الأسرة.. جوزي هرب مني
أنهت الزوجة حديثها قائلة: «لحد ما جوزي خرج من الحبس من سنتين ومن ساعة ما خرج راح لمراته الاولى وعيالها وهما مكنوش بيسألوا فيه طول فترة حبسه أصلا، بعد ما لفيت وراه في الاقسام ومع المحامين وفي الاخر لما خرج سابنا ومشي، هرب بقي ولا بيسأل ولا بيصرف ومعرفش عنه أي حاجة، ومعتمد عليا إني معايا فلوس وبصرف من ساعة ما اتجوزنا وبعد ما سيبنا بعض، ودلوقتي رافعة قضية نفقة عشان الولد بعد ما رفعت عليه قضية خلع».