أخبار محكمة الأسرة في رمضان
طرائف محكمة الأسرة.. إيهاب: سابت البيت عشان مانع عنها الفيس وجمال: مراتي عايزة تتطلق عشان جالها عريس
شهدت محكمة الأسرة قضايا لا حصر لها خلال شهر رمضان، تنوعت ما بين الطرائف والعجائب، وعلى غير العادة كان للرجال حظ كبير من الظلم في هذا الشهر، فمن المعتاد أن الزوجة هي الطرف المظلوم دائمًا في قضايا محكمة الأسرة، يعرض موقع الحادثة أهم القضايا التي شهدتها محكمة الأسرة هلال هذا الشهر .
من أكثر الطرائف التي شهدتها محكمة الأسرة لهذا الشهر هي القضايا التي أقامتها زوجة إيهاب بعدما رفضت أن تكون زوجة مطيعة ما جعلها تفتعل المشكلات باستمرار بسبب وبدون سبب، كان السبب الرئيسي في وجود الزوج في محكمة الأسرة هو ضعف شخصية الزوجة وترك أهلها يتحكموا في حياتها ويسيطروا عليها ويكونوا في النهاية سبب الخراب وسبب تواجد «إيهاب» حائر لا يعرف مصيره وهو على أبواب محكمة الأسرة.
عجائب محكمة الأسرة.. سعيد: خلعتني بعد ما كتبتلها الشقتين باسمها
حياة هادئة ومستقرة لا تحمل أي مشكلات أو خلافات بسبب الزوج المطيع الذي يفعل كل ما بوسعه من أجل إرضاء زوجته، وظن أنه ينال تقدير كل هذه السنوات وفجأته بدعوى خلع في محكمة الأسرة بعد ما اشترى شقتين تمليك بناءً على رغبتها، تابع الزوج لقاضي محكمة الأسرة حديثه: "كنت بحاول أعمل اللي تقدر عليه عشان أسعدها بأي طريقة وكل الي هي عايزاه كنت بحاول اعملهولها، وموضوع الشقة دا كان عشان خاطر متحسش إني حارمه من أي حاجة، بس اتصدمت لما لقيتها اختفت بقالها سنتين من غير أي مشاكل خالص ورفعت خلع، الكلام دا كان بعد ما كتبت الشقتين باسمها، واللي عرفته بعدين إنها عملت كدا عشان تتجوز في تعبي وشقايا".
عجائب محكمة الأسرة.. جمال: مراتي عايزة تطلق عشان جالها عريس
أراد «جمال» أن يعيش حياة طبيعية مع أسرته لكن الواقع كان له رأي أخر في هذا الأمر وحاوطت المشكلات منزل الزوجية من جميع الجهات ما أدى لترك الزوجة المنزل وبعد محاولات الزوج العديدة في استرداد زوجته لبيتهم أو حتى ليتموا الطلاق بشكل ودي، فشلت كل محاولاته وتركته زوجته حتى تعيش حياتها بعيدة عنه وترى مستقبلها بدونه وتتزوج من رجل أخر، تاركه «جمال» أمام محكمة الاسرة مع كوم من القضايا والحزن والحسرة.
أغرب قصص محكمة الأسرة.. سامية: ابني مبهدلني من ساعة ما جوزي توفى
حياة مثالية عاشتها سامية في عش الزوجية على مدار 30 عام مع زوج يفعل كل ما بوسعه من أجل رضاها، تحول كل هذا في غمضة عين بعد وفاة الزوج لتجد ابنها الأكبر هو سبب تعاستها وشقاءها في الحياة بسبب معاملته القاسية والجافة معها.
وقالت الزوجة لقاضي محكمة الأسرة: "بعد لما ابني اتجوز قولت له نسدد الفلوس اللي عليا أنا وأنت اللي هي أصلا فلوس جهازه عشان كتير 153 ألف جنيه مش هعرف اسددهم لوحدي لقيته مد إيده عليا أنا وأخواته البنات الأربعة وبقا علطول قلة أدب ويشتم فيا في الرايحة والجاية، أنا وأخواته بقينا مقاطعينه، وهو ميعرفش أي حاجة عن أخواته البنات ولا حتى بيفكر يساعدني في جهازهم ولا أي حاجة، عندي بنت خلاص هتتجوز والمأذون قالي اعمل قرار وصايا وجيت محكمة الأسرة عشان اعمل قرار وصايا".
أخبار محكمة الأسرة.. حسين: ابن عمها مديها فلوس عشان تخلعني
سنوات من الاستقرار عاشها حسين مع زوجته في منزلهما، زوجان متفاهمان دون أي مشكلات أو خلافات، بدأت التلكيكات والحجج تظهر من قبل الزوجة في أصغر المواقف، مضيفًا: "بتقف لي على الواحدة وعلى أي حاجة بعملها وانا مش فاهم ليه وإيه اللي غيرها كده مرة واحدة بعد ما كنا كويسين من غير أي مشاكل، سابت البيت ورفعت الخلع وعرفت ان ابن عمها ورا كل ده عشان هما متفقين على الجواز بقالهم فترة من قبل ما تسيب البيت، وهو اللي كان مرتب لها كل حاجة عشان تخلعني، وكمان كان مديها فلوس عشان توافق على الطلاق منه".
قصص محكمة الأسرة.. حنان: مبيضربنيش إلا بكابل الكهرباء
"بقالي 26 سنة عايشة معاه في ذل وقرف ومستحملة عشان خاطر العيال"، كانت هذه الكلمات الأولى التي بدأت بها حنان رواياتها لقاضي محكمة الأسرة مؤكدة على أن حياتها من بداية الزواج لا تعرف إلا التعاسة، وأكملت: "أسلوبه وحش معايا من أول ما اتجوزته بس كنت بقول معلش استحمل عشان خاطر العيال وعشان البيت ميتخربش وكننت فاكره إنه هيتغير والدنيا هتتصلح بس بالعكس بيزيد في ضربه وقلة أدبه معايا، مبيضربنيش إلا بكابل الكهرباء وانا تعبت من العيشة معاه"، سئمت الزوجة من طريقة التعامل لذا قررت التخلص من حياتها الزوجة بعد كل هذه الأعوام من خلال دعوى خلع.
حكايات محكمة الأسرة.. رحاب: اتجوز عليا عشان ميخلفش بوعده معاها
"قالي انا اتجوزت عليكي واحنا لسه في تالت شهر جواز"، كانت هذه الكلمات الأولى في قصة رحاب التي بدأت بها لقاضي محكمة الأسرة مؤكدة على حبه الشديد لها قبل الزواج وإصرار على الزواج منها.
تسترجع الزوجة شريط حياتها وتقول: "كنا مع بعض في الكلية وهو كلمني وقالي انه عايز يتجوزني خلصنا الكلية واتجوزنا على طول وكان كويس معايا أول ما اتجوزنا بس معرفش اية اللي حصل وفاجئني بالجواز ولما قعدنا واتكلمنا اكتشفت إنه كان واعدها من واحنا في الخطوبة"، تغاضت عن هذه المرة لعل الأمور تتحسن ولكن كرر خياناته أكثر من مرة لذا قررت التوجه إلى محكمة الأسرة ورفع دعوى طلاق للضرر.