محكمة الأسرة.. نادية : بعد ما شيلته أنا وأهلي عرف عليا واحدة متجوزة

استنجدت نادية بمحكمة الأسرة عسى أن تجد بها حل لمشكلتها مع زوجها الذي لم يقدر العشرة او يصون الأسرة والأطفال بينهم، تزوجت نادية عن قصة حب ولم تتوقع ابدا أن تنتهي حياتها التي بنيت على هذا الحب على أبواب محكمة الأسرة لكن ما شهدته مع زوجها من بحل وخيانة أجبرهها للوصول لهذه النهاية.

قصص محكمة الأسرة..سايبة جوزي بقالي سنة 

قالت «نادية» في بداية حديثها : «أنا متجوزة من 5  سنين معايا ولدين، ورافعة الخلع من شهرين ونص وسايباه دلوقتي بقالي سنة وشوية ، أنا وهو اتقابلنا صدفة واتعرفنا على بعض وحبينا بعض واتقدملي واتخطبنا والدنيا كانت تمام». 

حكايات محكمة الأسرة..أهلي اللي بيصرفوا علينا

تابعت «نادية» حديثها قائلة: «الحياة بينا كانت طبيعية كنا زي أي اتنين والمشاكل بينا مكانتش كبيرة وكانت بتتحل بسرعة، المشكلة معاه بس كانت بسبب إنه مبيصرفش ومبيسألش ومكبر دماغه من زمان، كان أهلي اللي بيصرفوا علينا طول السنين دي وأنا كنت صابرة ومش بقول حاجة عشان مخربش بيتي ومبهدلش ولادي».

دعاوي محكمة الأسرة. شفت جوزي خارج مع واحدة تانية 

أضافت الزوجة: «لحد ما اكتشفت أن جوزي عرف عليا واحدة تانية متجوزة، وعرفت لما شفتهم خارجين مع بعض ومتصورين، واجهتهم هما الاتنين هي مانكرتش علاقتها بيه قالت ان جوزها مش مهتم بيها وضعفت وهو انكر وقال مفيش حاجة بينهم وانهم صحاب بس، انا شفتهم حد مصورهم خارجين مع بعض مشفتش حاجة تانية بس معرفش لو حصل حاجة تاني ولا لا».

قضايا محكمة الأسرة..مش غايز يشيل مسؤولية حاجة

أنهت «نادية» حديثها قائلة: «الخيانة هي اللي خلتني سيبته، غير طبعا قله المصاريف وانه مبيسألش فيا ولا في العيال وعايش حياته، انا سيبتله البيت ورحت عند أهلي وهما اللي بيصرفوا عليا أنا والولاد عايشين معايا دلوقتي ورافعة عليه قضايا خلع ونفقة وقضية بالقايمة بتاعتي، هو رافض الطلاق الودي من غير سبب، ومفيش اي مسؤولية عايز يشيلها لا بيت ولا مصاريف ولا عيال، حاول يرجعني بس انا رفضت هو لسه على علاقة بيها ومش راضي يسيبها».