محكمة الأسرة.. أروى: عملي بلوك وسافر السعودية ومش راضي يعترف بابنه
تواجدت «أروى» في محكمة الأسرة تبحث عن أمل جديد في حياتها بعد الألم الي عاشته مع زوجها الذي دمر حياتها ودمر المستقبل في عينيها، كان خطأ «أروى» أنها لم تسأل عن زوجها قبل زواجها منه، واصطدمت بالحقيقة منذ زواجها عندما اكتشفت إنه مدمن للمخدرات وكان العنف والقسوة هو أسلوبه معها منذ زواجهم، وبالرغم من تحمل الزوجة لهذه الحياة الصعبة ما وجدته في النهاية هو الغدر من زوجها الذي لا يريد حتى الاعتراف بابنه الذي لم يولد بعد.
قصص محكمة الأسرة.. أهلي مسألوش على جوزي لما اتقدملي
قالت «أروى» في بداية حديثها: «أنا اتجوزت من سنة و3شهور، اتجوزت جواز صالونات ومن يوم جوازي وانا في مشاكل مع جوزي، لما جيت أتجوز أهلي مسألوش عليه وكانت دي المشكلة يمكن لو سالو عليه مكنش حصلي اللي حصلي ده».
حكايات محكمة الأسرة.. جوزي مدمن مخدرات
تابعت «أروى» حديثها قائلة: «جوزي كان بيشرب مخدرات من زمان وأنا مكنتش أعرف كان بيشرب كل حاجة والمخدرات لحست دماغه، كان مبيصرفش عليا ولو صرف يبقى قليل كل فلوسه كانت ضايعة على المخدرات، ولما اشتكي لأهله يقولوا هنعمل ايه استحملي جوزك».
دعاوي محكمة الأسرة.. حياتي كلها إهانة بسبب جوزي
أضافت الزوجة: «حياتي معاه كلها شتايم وضرب وإهانة كان أخلاقه مش كويسة هو وأهله، بيضربني بسلك الكهرباء ومرة ضربني بالسكينة وجت على ايدي وأنا بدافع عن نفسي عملت فيها عملتين كل ده بسبب مخدرات، محدش وقف معايا ومكنتش عارفة اعمل ايه صبرت عليه انه يتعدل لكن مفيش فايدة معاه».
قضايا محكمة الأسرة.. عملي بلوك وسافر عشان ميرجعنيش
أنهت «أروى» حديثها قائلة: «بعدما استحملته كتير حصل معاه أخر مشكلة ضربني ووداني عند أهلي وضحك عليا وقالي هرجعك تاني وأخرتها عملي بلوك من كل حاجه سافر السعودية ومعرفتش أوصله من ساعتها، واكتشفت من قريب إني حامل ولما جوزي عرف قال مش هيدفع جنيه للحمل ولا الولادة ولا هيعترف بالولد اللي أنا حامل فيه، وجيت عشان ارفع قضية نفقة عليه عشان أعرف أخد حقي وحق ابني اللي هيتولد منه».